Qinersinissamut naliliineq: Qinersinissaq KNR-imit paatsiveerussarneqarpoq
KNR paasiuminaassinnaasumik kukkuluttorpoq. Nutaarsiassaqartitsivik pisortanit aningaasaliiffigineqartartoq qinersisartunik isumasiuinera naatsorsuutigineqarsinnaasumit appasinnermik saqqummiussivoq.
Allattoq Christian Schultz-Lorentzen, aaqqissuisuuneq politikkikkullu oqaaseqartartoq.
Qinersisartunik isumasiuinerit soqutiginartuullutillu nutaarsiassanik pilersitsisarput. Tusagassiorfinnit soqutigineqarluartuusarput. Qinersisartunik isumasiuinerit allaaserineqarsimagaangata atuarneqarluartarput, qinersinissami qanoq isikkoqarnissaanik takutitsisinnaasarpoq. Qinersisartunik isumasiuinerit sivisuumik suliarineqartarput akisusarlutillu. Qinersisartunik isumasiuinerit suliaritillugit akisussaaffinnik minnerpaaffiliisoqartariaqartarpoq. Taamaasiortoqanngikkaangammi qinersisartunik nalornisitsisoqalersinnaasarpoq.
Nutaarsiassanik eqqunngitsunik qinersisoqassatillugu nittartakkatigut ataatsimoorfinni siammarterisoqartarpoq, soorlu facebookikkut, tamakkulu iliuuseqarfigineqarsinnaavallaarneq ajorput. Eqqunngitsunimmi oqariartuuteqartoqarsinnaasarpoq, taakkulu Fake News-imik taaneqartarput.
Nutaarsiassaqartitsivik KNR pisortanit aningaasaliiffigineqartartoq eqqoqqissaqanngitsumik qinersisartunik isumasiuivoq. Taamatut isumasiuititsinera eqqarsarnarlunilu oqaaseqarfigiuminaappoq. Qinerisartunik isumasiuisimaneq qularnartoqangaatsiarmat nangaassuteqarluarluni atuarneqassasoq, Ilisimatusarfimmi adjunkti Najaaraq Demant-Poort oqarpoq. Allaaserineqartoq taanna Sermitsiaq.AG-ikkut saqqummiunneqaqqammerpoq. Ilisimatuut allat aamma isumasiuineq isornartorsiorneqarpoq. Rasmus Leander Nielsen isornartorsiuisunut ilaavoq.
Qinersisartunik isumasiuinerit qinersinissaq qanoq isikkoqaratarsinnaaneranik tikkuussisinnaasarpoq, Folketingimullu qinersinissamut qinersisartut qanoq isumaliuteqarnerat saqqummiunneqartarluni. Isumasiuinerup inernerata qinersinissap qanoq isikkoqarsinnaanera aalajangiiffigeqataasinnaavaa. Savalimmiormiunit pigineqartoq Aperaa.gl KNR-imit qinersisartunik isumasiuineq suliaraa. Isumasiuinermi peqataasut tamatigoortumik akissuteqarnissaannut piumasaqaammik naammassinninngitsoq Demant-Poort isumaqarpoq.
Pitsaanerusariaqarpoq
Aperaa aqqutigalugu apersorneqarsinnaanissamut allatsissimasut taamaallaat isumasiuinermi apersorneqarsimanerat ilisimatitsissutigineqanngilaq. Taamaattumik isumasiuineq nalaatsortumik suliassaagaluartoq uani nalaatsortumik isumasiuisoqanngilaq. Aperaa.gl-imimi aatsaat peqataaniarluni nalunaarsimagaanni isumasiuinermut peqataasoqarsinnaavoq!
Sooq KNR-ip Aperaa.gl-imik isumaqatigiissusiorsimanera eqqoriassanngilarput. Suliffeqarfik pineqartoq Tusagassiivik Sermitsiaq.AG-imut qinersisartunik isumasiuinissamut neqeroortarnikuugaluarpoq. Neqeroorutaat itigartittarpagut. Suliaammi tatiginarpallaanngillat. Aamma akisunngillat. Kalaallit Nunaanni isumasiuinermut suliaqartartunit allanit akikinnerujussuupput. Taamaattumik suliffeqarfik pineqartoq sooq qinersisartunik isumasiuinermut suliaqartinneqarsimanersoq pakatsinarpoq.
Nittartakkatigut inuit naapittarfiini eqqunngitsumik siammarterisarnerit unammillerniarlugit nutaarsiassaqartitsiviit eqqortumik nutaarsiassiisariaqarput. Soorlu facebookimik atuisut tamanna ilisimassagaat.
Nutaarsiassaqartitsiviit tutsuiginartuusussaapput. Tamanna apeqquserneqanngisaannassaaq. Aap, tusagassiinerit pitsaanerusinnaapput. Taamaattoq tatiginassuseqartariaqarpugut, taamaattumik KNR siunissami assingusumik iliunnginnissaa neriuutigaara. Ukioq manna kukkuluttornertummi oqaatigineqarsinnaavoq.
Qinersinissamut sunniiniartut
Folketingimut qinersisoqaliivippoq, taamaattumik KNR-ip qinersisartunik isumasiuinera innuttaasunit upperineqassanngitsoq neriuutigaara. Qineqqusaarnermi susoqarnersoq qinersisartut malinnaalluassasut neriuutigaara. Maannakkummi piffissamiippugut qarasaasiat tiguarneqartarlutik, Issittorlu soqutigineqaraluttuinnarpoq. Kalaallit Nunaat assut soqutigineqarlualernikuuvoq.
Eqqunngitsumik paasissutissanik imalinnik Tusagassiivik Sermitsiaq.AG ullut tamaasa mailinnattarpoq. Danmarkip Kalaallit Nunaatalu ataqatigiinnerat ajortisarniarlugu nunanit allanit qinersinissamut allannguisoqarnissaa siunnertaralugu eqqunngitsunik paasissutissiisoqartarpoq.
Qineqqusaartunik mitalliisoqarsinnaasarpoq, nutaarsiassatigut aamma nittartakkatigut inuit naapittarfiini soorlu Facebookimi. Taamatut eqqunngitsumik paasissutissiisut nunanit allaneersuusarput. Taamaattumik KNR-ip eqqunngitsumik qinersisartunik isumasiuititsinera tupinnarpoq, kikkut tamat oqartussaaqataanerannik ajornartorsiulersitsisinnaasumik Folketingimut qinersisoqarnissaanut isumasiuititsivoq, taamaaliortoqarnissaalu naatsorsuutigisimanngikkaluarpara.