Qinersinermi taaguunneqartut imatut agguataarneqassangaluarput

Innuttaasut Inatsisartunut qinersinemi kimik taasissanersut pillugu isumasiuinermi nutaami Demokraatit, Nunatta Qitornai Suleqatigiissitsisullu kinguariassangatinneqartut, Siumut IA-lu siuariassangatinneqarput, Atassulli Partii Nalerarlu nikissangatinneqanngillat.

Ilisimatusarfiup Konrad Adenaur Stiftung Sverigemi - Stockholmimeersoq suleqatigalugu isumasiuisiuinerani, inuit 700-t nunanut allanut isumannaallisaanermullu politikkimut isumaannik apersuinermut akissuteqarsimapput.

Misissuinermi inuit ilaatigut partiimut qinersisarneq tunngavigalugu aperineqarsimapput, aqangu qinersisoqartuuppat partii sorleq qinissaneraat.

Misissuinermi akissuteqartunit tamanit partiimik sorlermik qinersisoqarnissaa pillugu akissuteqartunit 426-t (61 pct.) akissuteqarsimapput.

Akissuteqartut pingajorarterutaasa partiimik sorlermik taasinissartik suli ilisimanngilaat, tamannalumi aamma 2018-imi decembarip qaammataani isumasiuinermi taamaappoq.

Partii Naleraq, partiitut illuatungiliuttutut Kielsenimut naalakkersuisooqataanullu tatiginnikkunnaarnermik arlaleriarluni taasitsitsiniartartutut saqqummertartoq kinguarialaassangatinneqarpoq. Atassutip 2019-imi novembarip qaammataani nutaamik siulittaasortaartup, tassa Aqqalu Jerimiassen Siverth K. Heilmann taarserlugu siulittaasunngormat, qinersisartui allannguuteqartussaanngitsutut isikkoqarpoq .

Inuit Ataqatigiit siuariarnerpaanissartik nuannaarutigisinnaavaat, Demokraatilli partiitut tapersesuisutut aamma naalakkersuisooqataanertik pissutigalugit nuannarineaqarpallaarunnaarnertik takusinnaassavaat, tassa Niels Thomsenip Randi Vestergaard Evaldsenillu partiimit tunuarsimanerat malugingaatsiassavaat.

Paasissutissat pissarsiarineqarsimasut tamarmiusut qularnassusaat 2.5-3 procentiuvoq, uppernassusaalu 95 procentiulluni. Apeqqutini akisassani arlalinni tunngavigineqarsimavoq, partiimik qinersisineq pillugu apeqqutit nangaanartortaqarnerat. HS analyse misissuisimavoq, apersuillunilu misissuineq novembarip qeqqata missaanik decembarip qeqqata tungaanut ingerlanneqarsimavoq.

Taaguunneqartut procentinngorlugit
Powered by Labrador CMS