Skip to main content

Qinersinermi nuannannerit: Nipituumik nipilersornerit qiimmattarnerillu

Qiimmattarnerit, ersaartaannerit nipilersortullu Nuummi naapitassaapput. Partiit arlallit marlunngornermi unnukkut qinersinermut atatillugu ataatsimuualaarrapput.

Nerisassat pitsaasut, nipilersukkat pitsaasut parteeqatinillu nuannisaqateqarneq. Partiit ileqqoq malillugu marlunngornermi unnukkut qinersiviit matoreerneranni qinersinermut atatillugu ataatsimuualaarrapput.

Naleqqami qinersinermut atatillugu ataatsimuualaartut qiimmattarluni nillerrattoqartarpoq.

- Neriuppugut Inatsisartunut arlaqarnerusunik ilaasortaatitaqalissalluta. Arlaqarnerusunik ilaasortaatitaqalerneq isumaqassaaq qinersisartut qineqqusaarutivut tusaaniarluarsimagaat taperserluarsimagaallu, taamaammat taperserluarneqarsimanissarput neriuutigaarput,Pele Broberg oqarpoq.

Leiff Josefsen

Naleraq Kommuneqarfik Sermersuumi kommunalbestyrelsimi inissamik qulakkeerinnereersimavoq. Partiimi Ittoqqortoormiini kisiartaalluni qinigassanngortitaqarsimavoq. Partiip aqutsisuinit kommunalbestyrelsimut arlalinnik ilaasortaatitaqalernissaq neriuutigineqarpoq.

- Neriuutigaarput Kommuneqarfik Sermersuumi kommunalbestyrelsimut arlalinnik ilaasortaatitaqalersinnaassalluta, aamma illoqarfinnit allanit, oqarpoq.

Siulittaasoq qinigassanngorterngaartoq

Demokraatiniippoq siulittaasoq Jens-Frederik Nielsen. Qineqqusaarneq sakkortooq ingerlanneqareersorlu siulittaasup qinersinerup qanoq inerneqarnissaa pissangalluni utaqqivaa. Perngaammik Inatsisartunut qinigassanngortippoq.

- Maanna qinersisartut oqalutsinnissaannut piffissanngorpoq, inerneralu ataqqissavarput. Naalakkersuisoqatigiinnut ilaasimanerput ajornakusoortunillu aalajangeeqataasimanerput immaqa taasinernik annaasaqarsimanitsinnik kinguneqarsimasinnaavoq. Tamanna ilimagikannerpara, Sermitsiaq.AG-mut oqarpoq.

Leiff Josefsen

Taamaattorli Inatsisartuni sulinerup ingerlaqqinnissaa isertuutinngilaa.

- Kisianni isumalluarpugut, neriuppugullu, oqariartuutivut qinersisartunit tusaaneqarsimassasut sunniuteqarnissarpullu kissaatigineqarsimassasoq. Qanorluunniilli pisoqassagaluarpat, akisussaaffimmik tigusissaagut, oqarpoq.

Atassut nunaqarfinni ajugaasoq

Atassutip qinersinermut atatillugu ataatsimoorfiani qiimmattartoqartarlunilu ersaartaattoqartarpoq, najuuttullu tamarmik erfalasuaqqanik aalateripput. Partii kommunimut qinersinermi nunaqarfinni marlunni ajugaaqqammerpoq, tamannalu misigisaavoq qaqutiguulersimasoq.

- Unnummut nuannaarutissarpassuaqarpugut. Ataatsimeersuarnermi kingullermi sorlaqarfitsinnut uteqqinniarluta isumasioqatigiinnissarput toqqarsimavarput. Isumaqarpungalu tamanna maanna kinguneqarlualersoq, Atassut qinersisartunit ilisarineqaqqissinnaalersimammat, siulittaasoq Aqqalu Jerimiassen oqarpoq.

Leiff Josefsen

- Angusarissaarnissarput naatsorsuutigaara. Parteerput siulittuutigineqarsimavoq nungutinneqartussatut, kisianni partii tapersersorneqarnerulersimasutut isikkoqarpoq, aamma qinersinermut atatillugu nuannannermi, aamma inuusuttut akornanni. Tamanna isumaqarpunga ajunngilluinnartuusoq, Aqqalu Jerimiassen oqarpoq.

Siumup qineqqusaarutitut erinarsuutaa qittattullu

Siumumiippoq siulittaasup tullia Vivian Motzfeldt. Partii qineqqusaarneq sakkortooq ingerlanneqareersorlu partiimilu pissaanilittaasut nikisinneqareersullu qinersisartut qanoq naliliisimanerannik utaqqimaarpoq:

- Qinersinerup qanoq inerneqarnissaa pissangalluta utaqqivarput, kisianni neriuut suli attapparput. Siulittaasut nikinnerisa kingorna sammivipput nutaaq partiimi arlaannaannilluunniit akuerineqarsimanngilaq. Tamanna nukinnik atuiffigisariaqarsimavarput, isumaqatigiinnginnerlu tamanna qinersisartut ullumi taasisussanngoramik immaqa ilanngullugu isiginiarsimassavaat, Vivian Motzfeldt oqarpoq.

Leiff Josefsen

Unnuulli ingerlanerani qineqqusaarutitut erinarsuummut arlaleriarluni qittattoqartarpoq.

Inimi utaqqineq

Kim Kielsen, Naalakkersuisut siulittaasuat, Siumup immikkoortortaqarfianut taasinernik kisitsinermik pissangalluni kulturikkut illorsuarmi Katuami malinnaasumut, peqataanngilaq. Ujallut ameraasaatigut aseruuttoorsimanini annikilliuutigaa. Taamaattumik Naalakkersuisut siulittaasuattut Nuutoqqamini illuminiiginnarpoq. Taamaattorli sivikitsumik KNR-iliarluni, apeqqarissaarfigineqarnissani kissaatigineqarmat. Kielsenip Siumup qinigaalluarnissaa soorunami neriuutigaa.

Christian Schultz-Lorentzen

Partiip siulittaasunngorniunneq immaqalu Siumumi siulittaasunngorniaqqinnissani oqaaseqarfigerusunngilaa. Oqariartuut tamanna qinersinissaq aqaguttoq qulequttanik pilersitsivoq, Siumumilu ataqatigiilluartoqarneranik ersersitsigunarnani. Periarfissamik tusagassiuutitigut uteqqiinera pillugu qassiiliortoqarnera paasisinnaanngilara, Sivitsortumi oqaatigisarsimavara qinigassanngorteqqinnissara isumaliutigigiga, Kim Kielsen oqarpoq.

IA-kkunni qittattut

Inuit Ataqatigiinni aamma qittattoqarpoq, qineqqusaarnermilu erinarsuut arlaleriarlugu appisimaarneqartarluni.

IA-p siulittaasuata, Múte Bourup Egedep, qinersinerup qanoq inerneqarnissaa suli utaqqimaarpaa. Partiimi siulittaasut nikinnerisa kingorna aamma siullermeerluni qineqqusaarneraa.

- Qinersinerup qanoq inerneqarnissaa pissanngatigisorujussuuara. Suliassavut suliarisimavavut anguniakkavullu qinersisartunut saqqummiussimalllugit, maannalu qinersisartut naliliinerat utaqqivarput. Naammagisimaarinnippunga, Múte Bourup Egede oqarpoq.

- Isumalluarpugut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER