Qinersinermi naliliineq: Nunarput allaanerunngitsumik qinersivoq
IA-meersoq Aaja Chemnits aamma Siumumeersoq Aki-Matilda Høegh-Dam Folketingimut qinigaaqqipput. Qinersinerup inernerata nunatta annertuumik periarfissanitsippaa.
Qinersineq naammassivoq. Pissanganartorlu aatsaat aallartilerpoq.
Danmarkimi folketingimut qinersineq pissanganarluinnartumik ingerlasimavoq, piffissarlu kingullerpiaq atorlugu aatsaat paasineqarluni Mette Frederiksen ministeriunertut ingerlaqqissasoq. Nunatsinniit Savalimmiuniillu saamerliunerusut partiit ilaasortaat pingasut periarfissangissaarluinnalerput, danskimmi Socialdemokraatiisa naalakkersuisuutitaqalernissaannut piviusunngortitsinissamut qitiulluinnartumik inissisimalerput. Taamaaliortoqarsinnaavoq Socialdemokraatit siammasissumik suleqatissarsiulinngippata.
Politikkikkut malinnaasut arlallit naatsorsuutigereersimasaattut Aaja Chemnitz (IA) aamma Aki-Matilda Høegh-Dam (Siumut) qinigaaqqipput. Nunatsinni qineqqusaartut 13-iusut, ilaatigut nuimasoqarluartunit ilallit, soorlu Naleqqamiit Hans Enoksen aamma Demokraatinit Anna Wangenheim danskit inatsisartuini ilaasortanngunngillat.
Taama pisoqarpoq naak qineqqusaarnermi ilungersuuteqarluartoqaraluartoq. Qinersinerup inernerata takutippaa IA aamma Siumut Christiansborgimi inissilluarsimasut. Talerperliunerusunik qinersisartut ukiut 13-issaat isertitaqanngitsoorput. Atassut kingullermik folketingimi ilaasortaatitaqarpoq ukiut 13-it matuma siorna.
Ilaasortaatitanngortut pingaaruteqarluinnartut
Nunatsinnit qinigaaqqitsut pitsaalluinnartumik inissisimalerput. Qularnarallarpoq ministeriuneq Mette Frederiksen saamerliunerusumik naalakkersuisuutitaqalerniassanersoq, imaluunniit talerperliunerusunik suleqatissarsiussanersoq. Ulluni tulliuttuni tamanna aalajangerneqassaaq. Periarfissalli tamarmik ammapput.
Periarfissami siullermi Aaja Chemnitz aamma Aki-Matilda Høegh-Dam ilaasortatut politikkikkut isumaqatigiissuteqarluarnissamut periarfissagissaarluinnarput. Politikkkikkut aallaavissat assigiinngisitaarluinnarput.
Danmarkimi naalakkersuisoqatigiilersartut assigiinngisitaarluinnarsinnaapput. Suliassarlu annertuvoq. Mette Frederiksen qineqqusaarnermi ilaatigut oqarpoq nunatta peqqinnissaqarfia ilungersortillugu ikiuunnissamut ammasinnaalluni, naak nunatta peqqinnissaqarfik angerlaassimagaluaraa.
Isumaqatiginninniarnerni ataatsimoortariaqartut
Mette Frederiksen partiinik talerperliunerusunik suleqateqassaguni Moderaterne, ministeriunerusimasumik Lars Løkke Rasmussenimit siuttoqartut suleqatigissagunarpai. Løkkep politikkikkut suleqatiginnittariaasia qiterpasinnerusumik inissisimavoq. Taamatullu politikkikkut tatiginassusaa ajalusooratarsinnaavoq, politikkikkut anguniagai saamerliunerusunit ipisinneqassappata. Qinersinerup inerneri danskit saamerliunerusuini aamma talerpilliunerusuini aalassatsitsisinnaapput. Siunissamulli eqqoriaasinnaaneq tassanngaanniit nalorninarsivoq. Lars Løkke Rasmussenili politikeriuvoq nunatsinnut inussiarnisaarluartartoq.
Pitsaanerpaamik angusaqarnissamut nunatsinni politikerit - tamarmik Jens Palasinnguakkuluk aamma Ann Marie Chemnitzimit tamarmik ernutaqqeeqqiutaasunit - apeqqutaalluinnalerpoq. Taakkumi isumaqatiginninniarnermi ataatsimuussuseqartariaqarput. Suleqatigiinnerli politikerit taakku marluk tamarmik pitsaanerpaaffigisimanngilaat. Tamanna allanngortinneqartariaqarpoq, nunarput imminut akerarinerpaanngussanngikkuni. Politikkikkut perungassuseq maanna takutinneqartariaqalerpoq.