Qinersineq: MIO-p politikkikkut aallussineruneq ujartorpaa
Kalaallit Nunaat politikkikkut tallimanik sukarsuaqartariaqarpoq, sukarsuullu tallimaat meeqqanut meeqqallu atugaannut tunngasariaqarluni. Pinaveersaartitsissagaanni meeqqap inoorlaajuneraniit suliat aallartinneqartut pingaarnerutinneqartariaqartut, meeqqat illersuisuat isumaqarpoq.
Meeqqat atugaat, aamma meeqqerivinni, politikerit eqqummaariffigineqarnerusariaqarput.
Meeqqat pisinnaatitaaffii pillugit suliaqartup, MIO-p oqariartuutaa taama ersaritsigaaq. Nalunaarusiaq "Kalaallit Nunaanni ulluunerani neqeroorutit" Det Nationale Forsknings- og Analysecenter for Velfærd, VIVE-mit suliarineqarsimasoq, MIO-mit saqqummiunneqaqqammerpoq.
Meeqqat illersuisuat Aviâja Egede Lynge isumaqarpoq meeqqeriviit pitsaassusaat eqqummaariffigineqartariaqartoq, meeqqat "Kalaallit Nunaata siunissaannik" taaneqartarmata.
- Oqartaraanni meeqqat nunatta siunissarigai, taava aamma malitsigisaannik sulianik salliussisoqartariaqarpoq, meeqqat illersuisuat oqarpoq.
Sukarsuit tallimaat
Kalaallit Nunaat politikkikkut, nunatsinnut isaatitsissutinik sukarsuarnik sisamanik peqarpoq. Taakku tassaapput takornariaqarneq, aatsitassat, aalisarneq aamma nunami inuussutissarsiutit. Sukarsuit sisamat pingaartumik Inatsisartunut qinersilernermi oqallisigineqartunut ilaasarput. Meeqqat illersuisuat isumaqarpoq meeqqat atugaat meeqqeriviillu pitsaassusaat sukarsuit tallimaattut inissittariaqartoq:
- Meeqqat tassaapput Kalaallit Nunaata pisuussutaat pingaarneq. Taamaammat meeqqanut suliat tamarmik ataavartumik ingerlanneqartariaqarput salliutinneqarlutik, oqarpoq.
Kisitassaq ajornanngilaq
Nalunaarusiap "Kalaallit Nunaanni ulluunerani neqeroorutit" meeqqeriviit meeqqanut ineriartortitsinermi ilikkartitsiniarnermilu pitsaassusaannik misissuisimavoq. Misissuinerup takutippaa meeraaqqeriviit aamma meeqqeriviit meeqqat kisitsisinik ilikkarniarnissaannik aamma naqinnernik ilisarinninnerulernissaannik salliussiniarnerat unammillernartoqartoq, sulisunik ilinniarsimasunik amigaateqarneq pissutigalugu.
- Tamanna isumaqarpoq meeqqat meeqqat atuarfiinut atualertussanngoraangamik kisitsisinik ilisamaat killeqarsinnaasarpoq. Meeqqat inoorlaanerminniilli ilinniarnerat aallartittarpoq, aamma ilikkarusussuseqartuupput, meeqqat ilikkarniarnerat, perorsarneqarnerat inerisarneqarnerallu pitsaasuuppat, meeqqat atuarfiannut aallartinneranni kingornalu ilinniarneranni pitsaasumik inerneqarsinnaanera naatsorsuutigineqartussaavoq, Ellen Bang Bourup, MIO-mi meeqqat pillugit siunnersorti, oqarpoq.
Akullerni 7. klasset 2020-mi killiffissiorneqarlutik misilitsinnerannit inernerit takutippaat atuartut suliassat 41 procentii kukkunagit naammassisinnaasimagaat.
MIO isumaqarpoq perorsaasut meeqqat atuarfiini ilinniartitsisunut sanillersuunneqartariaqartut, meeqqat atualernissaannut piareersartussammatikkit. Sanillersuineq akissarsiatigut atugassatigullu takuneqarsinnaasariaqarpoq.
- Qinersisartut aamma eqqarsaatigisariaqarpaat politikerinik kikkunnik qinersinerlutik. Politikerit kikkut meeqqat atugaannik pitsanngorsaajumallutik sassarpat, Aviâja Egede Lynge oqarpoq.