Qinersineq aallartittoq: Ullaannarniit qiimmassimaartoqartoq
2022-mi Folketingimut qinersineq pisortatigoortumik aallartinneqarpoq - Nuummilu Timersortarfik qinersivittut ammarneqarmat taasiartortorpassuaqarsimalluni.
Nuummi Timersortarfik qinersivittut nalunaaqutaq 9.00 ammarneqarpoq.
Qinersinerlu pisortatigoortumik aallartinneqarluni.
Bea Mølgaard Lennert qinersinermik aqutsisuuvoq. Taassumalu qinersineq ammarlugu sianeq avilualaartippaa.
Taasivinnik ikioraaviit imaqannginnerat innuttaasunut takkussimasunut takutinneqarput. Imaqanngillat, maannakkumuugallartoq. Inuit tulleriiaallutik taasivissanut isaapput kingunitsiannguatigullu taasivinnik ikioraaviit immerneqalerlutik. Ajunngivissumik ingerlavoq.
Bea Mølgaard qinersinerup ammaqqammernerani Sermitsiaq.AG-mit pissarsiarineqartoq taamatut oqarpoq.
- Qinersivissap ammarneqarnerani takkuttut amerlanerat tupaallaatigilaarpara. Innuttaasorpassuit qiimmassimaarlutik takkunnerat nuannerpoq. Piffissap ingerlanerani ikiliartulissasut ilimagaara. Takkuttoqallattaaginnavippoq, ammaanersiornertulli amerlatigeqqilissanngitsut isumaqarpunga.
Inuppassuaqarpoq. Taakku ilagaat Jette Larsen, Aaja Chemnitzimut (IA) anaanaasoq. Taanna Danmarkimit najugaqartuugami allakkatigut taasereersimavoq. Qinersisoqarnerani panini tapersersorniarlugu nunatsinniippot - qinersisoqarnissaanullu qilanaarsimalluni:
- Qineqqusaartoqarnera sivisusimaqaaq. Sakkortusimavoq qineqqusaartoqarneranilu oqaatsit sukangasuut atorneqarsimallutik. Isumaqarpungali ullormi qinersiviusumi isumatusaarsimasut ajugaajumaartut, Jette Larsen oqarpoq.
Tassung ungasinngitsumi Oliver Urup issiavoq. Takkussimasut allat assigalugit takkutiaarsimavoq: - Piffissannut ajunngivissumik naapertuuppoq, taanna oqarpoq:
- Soorunami ullumi qinersisoqarnissaa qilanaarisimavara. Qinersinissaq pingaaruteqartuuvoq.
Oliver Urupip kimik taasinissani qularutiginngilaa.
- Pilersaaruteqarpunga, taanna oqarpoq illarlunilu.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...