Qineqqusaartoqarnerani MIO-p oqariartuutaa: Eqqugaasut oqaloqatigineqarlik

Meeqqanik kanngutsaatsuliorfiginninnerit meeqqallu taakku ikiorneqannginnerat qineqqusaarnermi annertuumik sammineqaleruttorneranni, Meeqqat Illersuisuata Aviâja Egede Lyngep kissaatigaa, politikerit inuiaqatigiillu eqqaasikkumallugit aaqqiissutit siunissamut qaninnermut kiisalu siunissamut ungasissumut isigisut pisariaqartinneqarmata.

Folketingimut qineqqusaarnermi oqallinneq pitsaasuussasoq Aviâja Egede Lyngep neriuutigaa.

- Meeqqanut ilaqutariinnullu annernartorujussuusinnaavoq, taakku anniaataat pillugit oqallittoqaraangat pineqartut ilanngunnagit, pingaartumik annernartarpoq oqallinneq appisaluussisaarluni ingerlagaangat. Taakku peqatigalugit iliuuseqartoqarnissaa kissaatigaat. Kingullertut minnerunngitsumilli aamma eqqaamassavarput, sammisamut atatillugu annertuumik pisuussutut kiisalu kanngusunnermik misigisaqartoqarsinnaammat, tamanna appisaluussinerup annertusarsinnaavaa. Taamaattumik sakkortuumik kajumissaatigaara oqallinneq ataqqinnilluni isumassuilluni maniguuttumik oqallittoqassasoq, tusagassiutinut nalunaarummi oqarpoq.

Pilersaarummik suliaqartoqarli
Maanna meeraqartoq maannakkorpiaq ikiorneqarnissamut pisariaqartitsisunik. Siunissaq ungasinnerusoq eqqarsaatigalugu suliniuteqarnissamik pisariaqartitsisoqartoq Aviâja Egede Lynge oqarpoq.

- Oqallinnermi aappaannaa sukkasuumik sammineqalersinnaavoq. Eqqaamassavarput meeqqat inissisimanerat akuerisassanngitsoq nutaajunngimmat, ajoraluartumillu oqalliteqqilernerit ilaartuutiinnarnik aaqqiissuteqapallannernik qamisaapallannerinnarnillu kinguneqarsinnaasarput. Taamaattumik maanna ukiuni pingasunngortuni Nuna Tamakkerlugu Iliuusissatut Pilersaarummik suliaqartoqassasoq oqaluttarpunga. Nunalu Tamakkerlugu Iliuusissatut Pilersaarutip isumaginninnermi suliassaqarfik imaluunniit meeqqat ilaai kisiisa imarissanngilai. Tassani FN-ip artikelii 19-it nunatta malinngisai aallaavigineqassapput, nunamilu tamarmi meeqqanut tamanut tunngassalluni, Aviâja Egede Lynge oqariartuuteqarpoq.