Qineqqusaarsimasut: Angusat tulluusimaarnarput
IA aamma Siumut ilaasortaatitaat Folketingimut qinigaaqqipput. Partiilli minnerit qineqqusaartitaat qinersinermi angusaminnut tulluusimaarput, qineqqusaarnermilu misilittagarilersimasat politikkimik suliaqarnermi atorluarsinnaanerarlugit.
Demokraatit, Naleraq, Atassut aamma Suleqatigiissitsisut qineqqusaartui arlaannaalluunniit Folketingimut qinigaanngillat. Inuit Ataqatigiit aamma Siumut aammaarlutik nunarput sinnerlugu Christiansborgimi issiasuutitaqassapput.
Qineqqusaartulli sinnerisa marlunngornermi 1. november qinersinermit angusat nuannaarutigalugillu tulluusimaarutigaat.
Demokraatit aamma Naleraq folketingimut qinersinermi 2019-imut sanilliullugu maanna siuariangaatsiarput, tassa Demokraatit 7,6 procentpointinik aamma Naleraq 4,6 procentpointinik siuariaramik.
- Tamanna qinersisartunit tatiginninnermik takutitsinertut isigaara, parteerput ataatsimut isigalugu siuariaateqarujussuarmat. Angusat kusanarluinnarpoq. Kisianni alaa, pissanganarluinnarpoq aamma, Anna Wangenheim oqarpoq.
Anna Wangenheim taajuunneqarnerpaat pingajuulluni 3.484-init taaneqarsimavoq. Qineqqusaarnermi sammisat arlallit Inatsisartuni politikkimik sulinermini ingerlateqqissinnaallugit oqaatigaa.
Politikki iperaruminaatsuuvoq
Naleqqamit qineqqusaartup angusat aamma nuannaarutigai.
- Takutippaa nuna tamakkerlugu qinerneqarluartugut, aamma siuariartugut. Tulluusimaarpunga, oqariartuutikka qinersisartunit tusaaneqarlutillu paasineqarsimammata, aamma nuannaarutigaara. Qinersinissanut tullernut sassaqqissanerlunga oqaatigisinnaanngilara. Qinersinerulli matuma kingorna politikkimik suliaqaqqinnginnissaq takorlooruminaappoq, Juno Berthelsen, 341-nit taaneqarsimasoq oqarpoq.
Partii atassut taasinernit 19.734-init marlunngornermi qinersinermi 720-nik taaneqarsimapput. Partii folketingimut qinersinermi 2019-imut sanilliullugu qinersisikinnerugaluartoq, taamaattoq partiip oqariartuutigisani qinersisartunut ersarilluinnartumik apuukkai, qineqqusaartoq Arnanguak Jeremiassen isumaqarpoq.
Pilerseqqinniarnissaanut inissaqarpoq
- Folketingimut qineqqusaarngaarpunga, nuannaarutigaaralu oqariartuutigisagut paasineqarluarsimammata. Qinersinermit angusat partiitsinni nalilersoqqissavagut, sulinermilu qanoq ingerlariaqqinnissat aamma oqaloqatigiissutigissallugit. Politikkimik suliaqarnissaq soqutigilluinnarpara, uninngilagut, Arnanguak Jeremiassen Sermitsiaq.AG-mut oqarpoq.
Taanna 436-init taajuunneqarsimavoq, folketingimullu qineqqusaarngaartuni taaneqarnerpaasimalluni.
Suleqatigiissitsisunit Tillie Martinussenip partiip ingerlateqqeriarnissaanut periarfissaqartoq, qinersisartuniillu partii suli tatigineqartoq nalilerpaa. Martinussen 176-it qinerneqarsimavoq, nunaqarfinniit illoqarfinniillu taaneqarsimalluni, tamannalu nuannaarutigaa.
- Aamma takutiinnarpaa partiitut mikisunnguatut, qineqqusaarnermi annertuumik aningaasartuuteqanngikkaluarluta, oqariartuutigisagut apuussinnaagigut, politikkimilu sulinerput tatigineqartoq. Maanna partii naqqaniit iluaniillu aallaqqaataaniit pilerseqqinniarlugu takussavarput, politikkikkut angorusutatsinnik angusaqarsinnaanerluta takussallugu. Partii taama mikitigitillugu, taasineq ataasiinnarluunniit annertoorujussuarmik isumaqarpoq, Tillie Martinussen oqarpoq.
Taassuma isertuutinngilaa Suleqatigiissitsisut naqqaniit nukittunerulerseqqinnissaannut sulineq oqitsuinnaanavianngitsoq, maannali nukissaqarluni sulinermik aallartitseqqinnissaminut nukissaqalersimavoq.