Qineqqusaarneq: Aleqap oqaatsinut tunngasoq qaqippaa

Aaja Chemnitz Larsen kalaallisut oqallorinngimmat Aleqa Hammondip saassuppaa.

Aleqa Hammond, valgdag

Aleqa Hammond (NQ) qineqqusaarnermi nikassaasoqannginnissaanik Aaja Chemnitz Larsenimut (IA) kaammattuuteqarpoq.

Akunnerit arlaqanngitsut qaangiuttut Aleqa Hammond (NQ) nammineq kusanarpallaanngitsumik Aaja Chemnitz Larsenimut tunngasumik saqqummerpoq. Facebookimi allagaqarluni Aaja Chemnitz Larsenimut tunngasumik oqaatsit tunuliaqutigalugit saassussivoq – taassumali atia toqqaannartumik oqaatiginngilaa.

- Pissanganassooq Inuit Ataqatigiit Inuit oqaasiinik oqaasilinnik sassartitaqassanersut, Aleqa Hammond allappoq.

Aaja Chemnitz Larsen maannamut Folketingimut qinigassanngortittuni IA saqqummiussaanni kisiartaagallarpoq.

Pisortatigoortumillu qineqqusaartitsinermi kalaallisuinnaq oqaluttoqarnissaa, taassuma neriuutigalugu ilanngullugu oqaatigaa.

- Neriuppunga folketingimut qineqqusaarneq oqaatsitta pisortatigoortut ataqqisaallutik atorneqarlik KNR-ilu danskisut allagartalersuilluni, taanna ilanngussamini allappoq.

Aaja Chemnitz Larsen pingasunngornermi Facebookimi videomik ivertitsivoq, tassanilu Aleqa Hammondimut toqqaannartumik eqqartugaqarnani oqaatsit pillugit apeqqut oqaaluuseraa.

- Kalaallisut pikkorinngikkaluarlunga kalaaliuvunga, Kalaallit Nunaallu nunaraara. Tamatta nunatsinni inissaqartinneqarta – tamattami innuttaaqataavugut naleqarlutalu, atorfissaqartinneqarpugut, taanna videop ilisaritinnerani taama allappoq.

Imminut nikassarnani tapersersoqatigiittoqarnissaanik videomi taanna kaammattuivoq.

Powered by Labrador CMS