Qimuttuitsunik ajutoorneq: Ikaartarfimmi Storebæltsbromi inuit arfinillit ajunaartut 16-illu aqqunartiterlutik
Storebæltsbromi qimuttuitsunik ajutoortoqarmat inuit arfinillit ajunaarsimasut, Fynimi Politiit uppernarsarpaat. Inuit 16-it aqqunartitersimapput.
Storbæltsbromi qimuttuitsut pingasunngornermi ullaakkut ajutoormata inuit arfinillit ajunaarput. Inuillu 16-it aqqunartiterlutik.
Fynimi Politiit taama nalunaaruteqarput, DSB-miillu paasissutissat saqqummiunneqareersimasut uppernarsarlugit.
- Storbæltsbromi qimuttuitsut ajutoorneranni maannamut inuit arfinillit ajunaarismasut 16-illu aqqunartitersimasut, Fynimi Politiit ilisimatitsipput, politiit allapput.
Inuit aqqunartitersimasut inuunerminnik navianartorsiornersut nutaarsiassaqartitsiviup Ritzauip paasiniarsimagaluarpaa, iluatsissimanaguli.
Ajunaartut tamarmik qimuttuitsuni ilaasuupput, DSB pingasunngornermi ullaap tungaani oqaaseqaateqarpoq.
- DSB-p uppernarsarpaa qimuttuitsumi sulisuusut pingasut tamarmik ajunngitsut, tusagassiutinut nalunaarummi danskit nalunaaqutaat malillugu 10:15 saqqummiunneqartumi DSB-miit allapput.
Qimuttuitsoq sukkasuuliaq Fynimiit Sjællandip tungaanukartilluni qimuttuitsup assartuutip ilamernganit aporneqarpoq.
Aporneqarnermi qimuttuitsoq sukkasuuliaq sakkortuumik uninniarsimavoq.
Ajutoortoqarnerani inuit 131-it sulisullu pungasut qimuttuitsuni issimasuupput. Nalunaarutigineqartumi siullermi ilisimatitsissutigineqaraluarpoq DSB-p qimuttuitsuutaani inuit 160-it ilaasuusut.
- Ajutoorneq DSB-p ilungersunartutut tiguaa, inunnillu ajunaartoqarlunilu aqqunartitertoqarsimanera aalassassutigaarput, DSB-mi pisortaaneq, Flemming Jensen, tusagassiutinut nalunaarummi allappoq.
Taassuma ilanngullugu nalunaarutigaa, DSB-p sapinngisani tamaat, “ilaasut qanigisaasullu ikiorniaramigit.”
Ilaasut ajoqusersimanngitsut pingasuunngornermi ullaap tungaani qimagussuunneqarlutik Nyborg Idrætcenteriliaanneqarput.
Tassani tarnip pissusaanik ilisimasalinnik pinartoqartillugu oqaloqateqartartunik oqaloqatissaqartinneqarput.
Inuit qimuttuitsuni ilaasimasut DSB-p politiillu kaammattorpai qanigisaminnut allallutik sianerlutilluunniit ajoratik nalunaasassut.