Qimussimik sukkaniuunneq OL-imi unammissutaasalersinnaasoq
Ukiukkut OL-ertoqarnerani qimussimik sukkaniuunneq unammissutigineqartuni ilaasinnaavoq, ukiuunerani OL-ernissaq Norgemit 2030-mi aaqqissuunneqassappat
Norgemiu siunnersorti IOC-milu ilaasortaasimasoq Gerhard Heiberg, Norge 2030-imi OL-imik aaqqissuisuussappat qimussimik sukkaniuunneq ukiuunerani OL-ertoqarnerani unammissutigineqalersinnaanera upperaa.
Taama norskit nutaarsiassaqartitsivii NRK Finnmark aamma VG taama allapput.
Norgemi tamarmi OL ingerlanneqarsinnaasoq
Norskit nutaarsiassaqartitsivii taakku marluk naapertorlugit illoqarfik Lillehammer, ukiuunerani OL-mik 1994-imi ingerlatsiviusimasoq ukiuunerani OL-ernissaq ukioq 2026-imi ukiulluunniit sisamat qaangiunnerini aaqqissuuteqqinnissaa piukkoorutigalugu qinnuteqaatigissallugu pilersaarutigigaa. Pilersaarutaasorlu unammiuaarnerit assigiinngitsut Norge tamakkerlugu ingerlanneqassaat, ilaatigut qimussimik sukkaniuunneq Finnmarkimi, Norgep nunatut immikkoortoqarfiini avannarpasinnerpaami inissisimasumi ingerlanneqarnissaa eqqarsaatersuutigineqarluni.
- 1994-imi illoqarfimmi OL-imik ingerlatsiviusimasumi OL-imik aaqqissueqqinnissamut pilersaarut siunnersorti aamma IOC-mi ilaasortaasimasoq Gerhard Heiberg suleqatigalugu suliarineqarpoq. Pilersaarusiami paasissutissat arlallit, nunat tamalaat akornanni OL-imut ataatsimiititaliarsuanit (IOC) pissarsiarineqarsimasut najoqqutaralugit suliarineqarpoq.
- Norge 2030-imi OL-imik aaqqissuissangaluarpat qimussimik sukkaniuunneq unammissutigineqarsinnaalernissaa, Gerhard Heibergimit upperineqartoq, NRK Finnmark allappoq.
Qimussimik sukkaniuunneq
Gerhard Heibergip VG-imut paasissutissiivoq, Lillehammer OL-ernissamut unammissutinik tallimanik ilassuteqarsinnaasoq.
- Tamanna periarfissanik pitsaasunik ammaassivoq: - Takorlooruk sisoraatinik tinngallattaarnernik, bandymik, qimmussimik sukkaniuunnermik, sisoraaserluni sumiissusersiornermik aammalu telemarksskiløbernermik siunnersuuteqartugut. Vikersundimi sisoraatinik tinngallattaartitsinerit, Drammenimi bandytitsinerit, Finnmarkimilu qimussimik sukkaniuunnerit Telemarkimilu sisoraaserluni sumiissusersiornerit ingerlanneqassallutik.