transport
Qimussertartut peqatigiiffiata snescooterit Tasersuakkut ingerlasaqqunngilai
Qimusseq Sisimiut Qeqqata Kommuniani qamutinut motoorilinnut ingerlaartarnermut malittarisassatut siunnersuummut nutaamut akerliliivoq
Qeqqata Kommuniani qamutinut motoorilinnut ingerlaartarnermut malittarisassatut nutaatut siunnersuut qimussertartut peqatigiiffiata Qimusseq Sisimiut ernumanartoqartippaa tupigusuutigalugulu.
Tassami siunnersuutikkut qamutit motoorillit Sisimiut avannaani kangerlunni ingerlasalersinnaapput. Tamannaannaangitsoq, aamma Kangerlussuup tungaanut Tasersuakkut ingerlasinnaalissapput. Tamanna qimussit pinngortitami akornusersorneqaratik ingerlaarsinnaanerannut annertuumik killiliissaaq taamaattumillu pissutsit allat assigalugit kalaallit qimmiinik qimuttunik ikiliartortitsissaaq.
Taamatut Qimusseq Sisimiut tusagassiorfinnut nalunaarutikkut allappoq.
Peqeatigiiffik isumaqarpoq ingerlaartarnermut malittarisassap nutaap Kalaallit Nunaanni inuiaqatigiit allanngortissagai, aammattaarli takornariaqarneq sunnissallugu. Taamaattumik peqatigiiffik akerliliivoq taarsiullugulu imatut siunnersuuteqearluni:
– Kangerluarsuk Tulliup avannaa qamutinik motoorilinnik ingerlaffigeqqusaassanngilaq, pissutigalugu tamanna qimussertartunit atorneqartarmat qimusserluni qasuersaarfittut aammalu aqisserniartarfittut ukalerniartarfittullu. Tamanna qimussertut ulloq ataaseq ingerlaartarfigaat pinngortitamiinnissaminnullu aammalu snescooterinik nipiliortunik akornusersorneqaratik nipaatsumiinnissaminnut periarfissatuaralugu.
Qimussip siunnersuunni tunngavilerpaa takornariaqarnermik ingerlatsisut tamanna ulloq ataaseq arlallillu takornarianik qimussiussinermut atortarmassuk, angalaarnerillu tamakkua tuniniartarlugit pinngortitaq nipaatsoq nalissaqanngitsorlu ussassaarutigalugit. Tamaani takuneqarsinnaapput tduttut, ukallit aqissillu, takornarianullu misigisaq annertuujusarpoq pinngortitami filmiliorneq, Stefan Hammer allappoq, taannalu Qimusseq Sisimiuni aningaaserisuuvoq.
– Aammami Kangerlussuarmi uppernarsineqarsimavoq qamutinik motootilinnik angalasoqaleraangat uumasut peeruttartut. Tamanna Sisimiut eqqaani peqqunanngilaq, Stefan Hammer allappoq.
Tamatuma saniatigut Amitsorsuaq avannaqqullugu Tasersuarmi ingerlaffissaq nutaaq akerlilerneqarpoq, pisutigalugu tamanna qimussertartunit qimusserluni qasuersaartarfittut aammalu aqisserniarfittut ukalerniarfittullu atorneqartarmat - tamatuma saniatigut tamanna aamma sunngiffimmi piniartut umimmanniartarfiattut toqqarneqarsimavoq.
– Sisimiut Kangerlussuullu akornanni siumut utimullu qimusserneq sapaatip akunnerata missaanik sivisussuseqartarmat - ilanngullugulu qimuttut ulloq ataaseq marlulluunniit qasuersaartittarlugit - piniarnissamut piffissaqarpianngilaq nalinginnaasumik sulilluni feeriarnermut naleqqussassagaanni. Ilanngullugu Kanerlussuup avannaa sunngiffimmi piniartut piniariartarfiat qimussimik tikikkuminaappoq, snescooterinillu atv-nillu piniarfigineqartarmat amerlasuut angiluttorsimallutik tikittarput, Stefan Hammer paasissutissiivoq.
Ingerlaartarnermut malittarisassat nutaat siunnersuutigineqarput Nunatsinni qimmit qimmiutillillu erloqinartumik ikileriarujussuarsimanerannik oqallinneq ingerlaleruttortoq, takuuk Sermitsiaq.ag-mi allaaserisat 11/9 2013 aamma 12/11 2013 kiisalu 2013-imi decembarip 10-annit 12-annut KNQK-p Ilulissani isumasioqatigiissitsinera.