Qimussersoq Tasiilap eqqaani ujaarineqarpoq
Qimussersoq ataaseq Tasiilami eqqaanilu ujaarineqalerpoq. Qimussersoq apuuffissaminut marlunngormat tikinngitsoorsimavoq.
Qimussersoq aallarnerminit ullut aappassaa suli muluvoq. Pineqartoq apuuffissaminut piffissami naatsorsuutigineqartumi marlunngormat tikissimanngilaq, politiillu maanna Tasiilap nunaqarfiisalu eqqaanni ujaasilerput.
Kalaallit Nunaata Politiivini pigaartut pisortaat, Malik Olesen Sermitsiaq.AG-mut ilisimatitsivoq.
- Ilaqutaasoq isumaaluttoq ullaaq nalunaaqutaq 07.00 missaani uagutsinnut kalerriivoq. Maqaasineqartoq Kuummiuniit qimusserluni marlunngormat aallarsimavoq, nunaqarfimmullu tikiffissaminut suli tikissimanani, pigaartut pisortaat oqaluttuarpoq.
Qimussersoq Kuummiuniit aallarami Tiilerilaamut tikittussaasimavoq. Marlunngormat avalakkamili suli muluvoq.
- Pineqartoq suli takuneqanngilaq tusarfigineqarsimananilu, Malik Olesen oqarpoq.
Taassuma ilanngullugu ilisimatitsissutigaa tunumi ujaasineq aallartittoq. Tasiilami nunaqarfiinilu innuttaasut qimussersup sumiissinnaaneranik ilisimannittut, takunnissimasinnaasut tusagaqarsimasinnaasulluunniit politiinut saaffiginneqquneqarput, uunga 70 14 48.