Qimusserluni takornariartitsineq kangerlummi aalisartoqarneranit unamminartorsiortoq

Ilulissani isorartuumut qimusserluni takornariartitsineq kangerlummi aalisarnermit unamminartorsiornerani, illoqarfimmi saniliani Qasigiannguani siuariartortoqarpoq - tassani arnat qimussiussisartut ujartorneqarput

Hundeslæde, Sisimiut

Isorartuumut qimusserluni takornariartitsinerit akunnerit marluk sinnerlugit sivisussusillit Ilulissat Kangerluani aalisartoqarnerani unammillernartumik aqqusaagaqarput, ulluni makkunani kangerlummi aalisarneq sikuunerani aalajaappoq, kangerlummilu pisat Ilulissanut assartorneqarnissaanut pitsaasumik neqerooruteqartoqarmat pitsaasumik atugaqartoqarpoq.

- Ingammik akunnerni tallimani aammalu ulluni marlunni qimussertitsisarnitsinnut qimussiussisussanik naammattunik pissarsisinnaanngilagut. Angalanernit aaqqissuuteriikkani pissarsiarisartakkatta ilaannit isorartuumut qimussiussinerit peertariaqarnikuuagut. Taakku maanna Kangerlussuarmi ingerlanneqartarput, Jakob Schytz, illoqarfimmi takornarialerisut ilaanni World of Greenlandimi ingerlatsinermut aqutsisoq, Sermitsiaq.AG-mut oqarpoq, nangipporlu:

- Qimussiussisartut aalisarnermit pissarsiaqarnerupput. Taakku pingaarnersiuinerat paasilluarparput, aalisarneq takornarialerinermit aningaasanik isaatitsiffiunerummat. Qimussiussisartut tunisiartorniarlutik illoqarfiliaqqaartarallarmata allaanerugaluarpoq. Maanna sikukkut kilometerit arfineq-pingasuinnaat ingerlariarlutik aalisakkanik tunisisinnaapput. Tassani Royal Greenlandip aamma Halibut Greenlandip aalisakkat aasarpaat.

Qasigiannguani sivitsuisoqarniarpoq

Qimussiussilluni takornariartitsisarnerup Ilulissani inuussutissarsiutigalugu aalisarnermit unammillerneqarnerani, illoqarfimmi sanilerisaani Qasigiannguani allatut inissisimasoqarpoq. Tassani isorartuumut qimusserluni takornariartitsineq siuariartorpoq.

- Qimusserluni isorartuumut takornariartitsisarneq ukiuni kingullerni marlunni siuariartorpoq, Discobay Toursimi piginneqataasoq, Niisinnguaq L. Geisler, Sermitsiaq.AG-mut oqarpoq.

Discobay Tours ilaatigut sivikinnerusumik aamma isorartornerusunut qimussimik takornariartitsisarpoq.

- Qujanartumik piffissami uani qimussiussiffiusumi takornariat qimussernissamut siumut pisisimasut, qimussiussisartunit ingerlanneqarnissaat isumaqatigiissusiorfigereerparput. Aamma isorartuumut qimussiussinerit tassani pineqarput, ullunik tallimanik sivisussuseqartut, takornariat Ilimanamit qimussimik aallarlutik Tasiusamukartassapput, tassanngaanniillu sermersuarmut, Tasiusamullu uterlutik, kingornalu Qasigiannguanut, tassanngaanniillu Ilimanamut uteqqillutik, Niisinnguaq L. Geisler oqarpoq.

- Kisianni piffissap qimussiussisarfiusup sivitsorneqarnissaa isumaliutersuutigaarput, takornarianik kaperlaap nalaani qimussertitsisarusukkatta, takornariat taamaalillutik aamma kaperlaap nalaani arsarnerit kusanartut misiginiassammatigit, Niisinnguaq L. Geisler oqarpoq.

Takornariat arnanik qimussiussisartunik ujartuipput

Takornariat aamma arnanik qimussiussisartoqarnersoq apersuikkajuttartut, Niisinnguaq L. Geisler oqaluttuarpoq.

- Takornariat arnanik qimussiussisartunik apersuutiginnittarmata, arnanik qimussiussisartunik ineriartortitsinissamut soqutiginnippugut. Qimussimik takornariartitsisarneq pillugu innuttaasunik aapriilimi ataatsimiititsileruma tamanna qaqinniarlugu eqqarsaatigaara, Niisinnguaq L. Geisler oqarpoq.

Qasigiannguani isorartuumut qimusserluni takornariartitsisarnerit siuariartorneranni, Ilulissani World of Greenlandip isorartuumut qimusserluni takornariartitsisarnerit aappaagumit neqeroorutigiunnaarpaat.

- Akunnerni tallimani aamma ulluni marlunni qimussiussinissamut neqerooruteqarsinnaajunnaarpugut, taamaattumik aappaagumiit neqeroorutigiunnaarpagut. Uggornarpoq, tassami nunap timaani unnuilluni misigisassaq immikkuullarissuullunilu nuannermat. Siunissami akunnerni marlunni taamaallaat qimussiussinernik neqerooruteqalissaagut, Jakob Schytz oqarpoq.

Powered by Labrador CMS