Qimmit tamarmik akiuussutissamik kapineqassapput

Qimmit tamarmik, ingammik qimmit qimuttut qimmit nappaattaannut aamma parvovirusimut akiuussutissamik kapineqartassasut, Inatsisartut tamarmik isumaqatigiillutik akuersissutigaat, tassani qimminik piginnittut qimmitik akiuussutissamik nappaatinut taakkununnga kapitinnissaat inatsisitigut pisussaaffiuvoq.

Qimminut qimuttunik savaatillillu qimmiinik akiuussutissamik kapuinissamut meqqilersuinissamullu suliniutigineqartoq nunatta karsianit aningaasalerneqassaaq, qimminik qimuttuunngitsunik qimmillit namminneq akiliisassasut, soorlu maannakkut namminneerlutik akiliisartut, Namminersorlutik Oqartussat ilisimatitsipput.

4 millionit koruunit sinnerlugit
Akiuussutissamik 2017-imi kapuilerneq Namminersorlutik Oqartussat 4.5 million koruunit missaannik aningaasaliiffigissagaat naatsorsuutigineqarpoq.

Najukkani akiuussutissamik kapuinerit, nalunaarsuinerit meqqilersuinerillu kommuninit akisussaaffigineqassapput, Naalakkersuisunit nakkutigineqassalluni.

Ataatsimut qarasaasiakkut katersuineq
- Naalakkersuisut aamma qimmit nappaataannut akiuiniarnermi pitsanngorsaatinik siunertamullu naapertuuttunik arlalinnik suliniuteqassapput, taamaalillunilu kommunini suliassat malunnaatilimmik oqinnerulersinneqassallutik, Namminersorlutik Oqartussat tusagassiuutinut nalunaarummi allapput.

Tamanna ilaatigut pissaaq paasissutissanik qarasaasiamik katersuiviliornikkut, tassuuna nalunaarsuinerit allallu oqinnerusumik aqunneqarsinnaalissallutik.

Kalaallit Nunaanni qimmit 18.000-it missaani amerlassuseqarput.

Atuaruk: Qimmit nappaalanerannut akiligasseerujussuartoqarsinnaasoq