Qimmit qimuttut pillugit Naalakkersuisut nutaamik inatsimmik saqqummiussissapput
Qimminut tunngatillugu inatsit atuuttoq nutaanngilisimavoq. Naalakkersuisut nutaamik inatsisiliornissamik kissaateqarput, siunnersuullu suliarineqaleruttorpoq.
Kalaallit qimmiata kultoorikkut piujuartinneqarnissaannut tunngatillugu Naalakkersuisut misissueqqullugit peqquneqarnissaannut siunnersuummi, isumaliutissiissummi paasinarsivoq Naalakkersuisut qimmit qimuttut pillugit inatsimmik nutaamik suliaqartut.
Qimmit qimuttut piujuaannartinneqarnissaannut misissuisoqarnissaanut siunnersuut tunngaveqarpoq, qimmit qimuttut qimminit allanit akusaasarsimanerat ukiuni kingullerni paasineqartalermat.
Sisimiuniit avannamut Tunumilu qimuttunik qimmeqargiupput.
Inatsit nutaaq pisariaqartoq
Kultooreqarnermut, ilinniartitaanermut, ilisimatusarnermut ilageeqarnermullu ataatsimiititaliamut akissutiminni Naalakkersuisut erseqqissaatigaat, qimmit qimuttuunngitsut qimuttoqarfinnut eqqunneqarsimatillugit pineqaatissiinissamut periarfissat pisariaqarmata, inatsimmik nutaamik suliaqartoqartoq. Qimmit qimuttuunngitsut Avannaanut pissunneqaratarsinnaaneri nakkutigiuminaappoq.
- Erseqqissumik oqaatigalugu pissutsini ataasiakkaani sakkussanik atorneqarsinnaasunik Naalakkersuisut amigaateqarput. Qimminut tunngatillugu inatsit atuuttoq 1998-imeersuuvoq taannalu naapertorlugu akiliisitsinerit kisimik aqqutigalugit pineqaatissiisoqarsinnaavoq. Suliassaqarfimmut tassunga tunngatillugu akisussaaffiit pineqaatissiisarnerillu erseqqissaatigisarnissaat ajoraluartumik pisariaqartarsimavoq, Naalakkersuisut ataatsimiititaliamut akissutiminni allapput.
Periarfissat siammasinnerusut
Qimmit illersorniarlugit assiaqusiiniarnissamut malittarisassat ersarissarneqarnissaat pisariaqarmat, nutaamik inatsisiliortoqarnissaa pingaaruteqartoq Naalakkersuisutt tunngavilersuipput.
- Inatsit taanna aqqutigalugu pineqartunut tunngatillugu inatsisaasimasoq sukateriffigineqarlunilu erseqqissaateqarfigineqarpoq. Kalaallit qimmiinik qimuttunik qimmeqarfinnut qimminik allanartanik eqqussisoqarsimatillugu iliuuserineqartartussat inatsisissatut siunnersuummi sammineqartut ilagaat. Qimmit pillugit inatsisissatut siunnersuummi nutaami sakkortunerusumik pineqaatissiisinnaanissaq periarfissiissutigineqarpoq, akisussaaffeqartarnermut tunngasut ersarissarneqarput aammalu pasinartoqartillugu iliuuseqartarsinnaanissat periarfissiissutigineqarlutik, Naalakkersuisunit nassuiarneqarpoq.
Pilersaarutit malillugit siunnersuut Inatsisartut ukioq manna upernaakkut ataatsimiinneranni Naalakkersuisunit saqqummiunneqassaaq.
Isumaliutissiissut tamaat uani atuarsinnaavat.