Qimmit qimuttut pilluarnermik misigisimalersitsisartut
27-nik ukiulik Aviaq Høegh arnaavoq nutaaliaasoq – kalaallit kulturianni pisoqaanerpaami sorlaqartoq. – Qimussertartut siuaasavullu ataqqivakka, oqarpoq.
Aviaq Høegh Sisimiuni 1993-imi inunngorpoq qimminillu qimuttoqarluni peroriartorsimalluni. Eqqaamasinnaasamisut sivisutigisumik ilaquttani peqatigalugit qimussertarnerit eqqaamavai.
Aviisi AG taama allappoq.
Ataatani peqatigalugu qimminik nerisitsinermut ikiuuttarneq siusissukkulli ilikkarsimavaa. Ukiukkut sapaatip-akunnerisa naanerini aqissiliartarsimapput. Meeraalluni qamutinit katataalluni arpallunilu qamutit saniannukarniarsaraluni ikeqqinniarsaralunilu nuannersuusimavoq. Eqqaamavaali ataasiarluni qamutit angusinnaasimanagit ataatanilu unissimanngitsoq, taamaattumillu kisimiilluni pisuinnarluni angerlartariaqarsimalluni, qungujulluni oqaluttuarpoq.
Meeqqat atuarfiata kingorna Qaqortumilu ukiuni pingasuni ilinniareerluni Sisimiunut uterami qimminik soqutigisaqarnera sukumiinerulersimavoq, kisimiillunilu qimussertalerluni qimminillu paaqqutarinninnermut akisussaaffimmik tigusilluni.
Kukiiartarpai meqqullu isigaasa ataanniittut killortarlugit. Qimmit ajunnginnersut takuniarlugit ullut tamaasa alakkartarpai. Aasaanera aalisarnermut nerukkaasiornermullu atorneqartarpoq, qimmit ukiup sinnerani nerisinnaasaannik, nerukkaasiassanut panertunut akisuunut taakkua tapertaalluartarmata.
Tamatumali saniatigut qimuttut ilaqutariit nerisaasa sinnikuinik nerisinneqartarput Aviarlu savat erlaviinik aamma pissarsisimalluni.
Aviisimi AG-mi allaaserisaq tamakkerlugu atuarsinnaavat. Aviisi uani pissarsiariuk: