qimagussortitsineq
Qimmit nunaqarfinnit qimagussortitsiviusunit nuunneqassapput
Tassaarsuup Nuugaatsiaq eqqormagu qimmit ikitsuinnaat ajunaarput
Nunaqarfinni pingasuni qimagussortitsiviusuni Illorsuarni, Niaqornani aamma Nuugaatsiami qimmit paarineqarlutillu nerukkarneqarput.
Kalaallit Nunaanni Politiini unnerluussisussaatitaaneq Liselotte Bøhm taama oqarpoq.
- Sumiiffimmi angalaarpugut, politiillu angallataat Sisak IV nunaqarfinnukaqattaarpoq. Tassunga atatillugu qimmit nerukkarneqarnerat isumagaat, taanna Sermitsiaq.AG-mut oqarpoq.
Tamatuma saniatigut alianartoqarnerani nuannaarutaasumik nutaarsiassaateqarpoq. Tassaarsuummi Nuugaatsiaq eqqormagu qimmit amerlanerpaat annapput.
- Qimmit ilaat annaaneqarput. Amerlassusaat piginngilakka, kisianni ikitsuinnaasut nalunaarutigineqarpoq, Liselotte Bøhm oqarpoq.
Qimmit nunaqarfinni pingasuni qimanneqarsimasuni maanna attanneqarsinnaanngilaq, taamaammat politiit aaqqiissutissamik sulissuteqarput.
- Qimmit nunaqarfiit pingasut arlaannut nuunneqarnissaat pilersaarutaavoq, unnerluussisussaatitaasoq oqarpoq.
Tamanna qaqugu piumaarnersoq Liselotte Bøhmip oqaatigisinnaanngilaa, sila ajunngittariaqarmat aamma qulimiguulik S-61 atorneqarsinnaasariaqarmat.
Maannakkorpiaq sumut nuunneqarnissaat aamma oqaatigisinnaanngilaa.