Qimmit nakkutigineqarnissaat aaqqissuisut akisussaaffigaat

Kalaallit Nunaanni Qimussertartut Kattuffiata erseqqissarpaa qimussersuaqartoqarnerata nalaani qimminik nakkutiginninneq ukiumi pineqartumi aaqqissuisut akisussaaffigigaat, tamannalu akisussaaffigiuaannarsimagaat.

Ileqquni ilaalluinnalersimasumi, Avannaata Qimussersuani, unammersuartoqareernerata kingorna pisut mamianarsinnaasut arlallit saqqummerput.

Ajugaasuugaluartoq ajugaasinnaanngitsutut kingorna nalilerneqarpoq, aqqutip ersarlunnerani aqqutaasoq uniorlugu qaninnersiuisimanera paasineqarmat. Qimmeq teriarsuarnut toqunartutortitaasimalluni toquvoq. Kingullerlu pisoq tassaavoq unammersuarnermi ajugaasoq KNR-imut oqaluttuarmat, qimmii unammersuarnissaq sapaatip akunnera sioqqullugu nerukkarujussuarneqarsimasut, sungiusarnissai ajornakusuulerlutik.

Qimmit nakkutigineqarnissaat

Qimussimik unammersuartoqassatillugu illoqarfimmi unammersuarfiusussami qimmerpassuit ataatsikkut pitussimatinneqartarput. Maanna arlallit kaammattuipput Avannaani unammersuartoqarnerata nalaani sapaatip akunnerani ataatsimi naapisimaartoqarnerani qimmit ulloq unnuarlu nakkutigineqartalissasut.

Sermitsiaq.AG-p Kalaallit Nunaanni Qimussertartut Kattuffiat, KNQK, kaammattuummik malinnissanersut aperai.

- KNQK Avannaata Qimussersuaqartoqarnissaanik aaqqissuisuunngilaq, illoqarfik unammersuarfiusoq tassaavoq aaqqissuisoq. Aaqqissuisullu taakkuupput, taakkuusuaannarnikuullutillu, qimmit pinerlineqannginnissaat anguniarlugu nakkutilliisussat, KNQK-mi allattaaneq, Hansiaraq Zeeb oqarpoq.

Ataatsimeersuarnissaq

Taassuma erseqqissarpaa aaqqissuisut ilisimatinneqareersimasut aqagumut unammersuartoqartussanngorpat qimmit qimuttussat ulloq unnuarlu nakkutigineqarnissaa pillugu aaqqiisussaasut.

- Maannali siulersuisuni pisariaqarsorilerparput malittarisassat taama ittut ersarissarneqassasut. Siulersuisut tulliani ataatsimeersualerpata kaammattuutit taama ittut ersarissassallugit aalajangerpugut, Hansiaraq Zeeb oqarpoq.

Hansiaraq Zeeb ilisimatitsivoq kattuffik oktobarimi ataatsimeersuassasoq.

Powered by Labrador CMS