Qimmiutillit kommunimilu sulisut akiuussutissalersuinermik suliaqartartut pisarnermissut iliuuseqaannassapput. Uumasunut Nakorsaqarfik Inuussutissalerinermullu Oqartussaaffik qaammatip ataatsip matuma siornatigut taamatut nalunaaruteqarpoq.

Qimmit nappaataannut perlerornermullu akiuussutissat 2500-t missaanniittut - assartorneqarnerminni toqqorsivimmi kukkusumik uninngatinneqarsimanerat pissutigalugu - igiinnarneqareersimasut, allakkatigut oqaaseqaat tamanna saqqummiunneqarpoq. Akiuussutissanik nutaanik ingerlaannartumik inniminniisoqarsimavoq.

Akiuussutissalli suli tikissimanngillat. 

Pingaartumik Sisimiunut tikissimanngillat, tassani nillataartitsiviit marluk akiuussutissanut uninngatitsiviusartut qaammatini marlunni imaqarsimannginnamik. Lone Kristensen Sisimiuni Sisimiullu nunaqarfiini miljøarbejderisut sulisoq taamatut ilisimatitsissuteqarpoq.

Nappaatinut illersuutissat amigaataasut

Uumasunut Nakorsaqarfimmi Inuussutissalerinermullu Oqartussaaffimmi uumasut nakorsaata Anna Jespersenip Sernmitsiaq.AG-mut ilisimatitsissutigaa, akiuussutissat nutaat Kalaallit Nunaannut tikissimasut, maannalu kommuninut nassiussuunneqaleruttortut.  

Inatsilli naapertorlugu qimmit sapaatip-akunnerinik aqqaneq-marlunnik utoqqaassuseqalernerminni parvovirusimut/qimmit nappaataannut akiuussuserneqartussaapput - tamatumalu kingorna ukiut pingasukkaarlugit akiuussuserneqartussaallutik. Tassa qimmit qimuttut maajimi junimiluunniit inunngorsimasut piffissaagallartillugu akiuussuserneqarsimanngillat naappaatinullu illersuuteqaratik.

Uumasunut Nakorsaqarfimmit Inuussutissalerinermullu Oqartussaaffimmit Sermitsiaq.AG-mut ilisimatitsissutigineqarpoq, pilersuiniarnermi ajutoorneq sumiiffiit ilaannut aatsaat atuutilinngitsoq.

Oqartussanit oqaatigineqarpoq, Kalaallit Nunaanni ingerlasussanik piareersaanermi aqutsinermilu aamma attaveqaasersuutitigut atugassarititaasut eqqarsaatigalugit tamanna naatsorsuutigineqartariaqartoq.

Ataatsimut isigalugit oqaaseqartoqarsinnaanngitsoq

Sermitsiaq.AG-mit oqartussanut apeqqutigineqarsimavoq, qimmiutillit kommunimilu sulisut akiuussutissalersuisartut pisarnermissut iliuuseqaannassanersut.

Uumasunut Nakorsaqarfimmit Inuussutissalerinermullu Oqartussaaffimmit tassunga akissuteqarluni oqartoqarpoq: Tunngaviatigut aap. 

- Kommunini assigiinngitsuni kommunillu iluini inissisimaffiit assigiinngitsupilussuusinnaapput. Taamaammat ataatsimut isigalugit oqaaseqartoqarsinnaanngilaq, uumasut nakorsaat Anna Jespersen allappoq. 

Taassuma itisiliilluni oqaatigaa, akiuussutissanik inniminniisimanermut atatillugu oqartussat isumaqartut ajunngitsumik oqaloqatigiittoqartoq.