Qimmilerisut ataqatigiissaarisuata terianniat nerukkarneqarneri unitseqqugaa
Terianniat Ilulissani illoqarfiup iluani angalaartalernerat qimmiaqqat perlerornermik tunillatsinnissaannut aarlerinartorsiortitsilerput. Qimmilerisut ataqatigiissaarisuata terianniat arlallit aallaasariaqarsimavai.
Ilulissani suliffeqarfiit ilaanni sulisut ilaat teriannianik nerukkaasarnerisa kingunerisaannik terianniat illoqarfimmi angalaartalersimapput. Taamaasiornerli kingunerluuteqarsinnaavoq, terianniammi perlerornermik nappaateqarunik qimminut perlerornermik tunillaasinnaapput.
Qimmilerisut ataqatigiissaarisuat teriannianik arlalinnik piffissami kingullermi aallaasaqartariaqarsimavoq.
Qimmiaqqat akiuussutissalersorneqarsimanatillu pitutaasannginnamik perlerornermik tunillatsinnissaminnut aarlerinartorsiornerupput. Qimmilerisut ataqatigiissaarisua maanna kaammattuivoq: Terianniat nerukkarunnaarsigit.
- Suliffeqarfiit ilaanni sulisut teriannianik nerisitsisarnerat, taamalu illoqarfimmut qanillattuinissaannut sungiussisitsisarnerat pitsaanngilluinnartuuvoq. Pingaartumik qimmit piaqqat suli pitussimanatillu kapitissimanngitsut teriannianit perlerortunit qaninngoorneqarnermikkut perlerornermik tunillanneqarsinnaapput, taamaasillutillu qimmit allat nalaatsortumik aamma tunillanneqarsinnaallutik, Ilulissani qimmilerisut ataqatigiissaarisuat Ilannguaq Hansen oqarpoq.
Terianniat arlalinnit takuneqartut
Avannaata Kommunia naapertorlugu terianniat arlaqartut najugaqarfinni, Hotel Arcticip eqqaani eqqaavissuarmilu naammattoorneqartarput. Terianniat assileriarlugit nittartakkani attaveqatigiiffiusuni aamma siammarterneqartarput, mianersoqqusisoqartarlunilu.
- Innuttaasut teriannianik kalerriutaat pimoorulluinnartarpagut, terianniallu arlalikasiit maannamut aallaallugit toquttariaqarsimavagut, Ilannguaq Hansen ilisimatitsivoq. Taassuma misigereersimavaa illoqarfiup isuaniik akianut terianniamik malersuilluni, pisarinngitsoorluguli.
Perlerortunik naammattoorsisarput
Avannaata Kommunia ilisimatitsivoq terianniat perlerortut pisarineqartartut. Qimmip terianniaq perlerortoq aamma pisarisimavaa.
- Qimmeq perlerornermut akiuussutissamik kapitissimagallartillugu tunillatsinngilaq. Piffissami allami angut illoqarfiup avataaneersoq talittarfimmi terianniamit qaninngoorneqarsimavoq. Angutip terianniaq aallaallugu toqussimavaa, taannalu aamma perlerortuusimavoq. Taamaammat suliffeqarfiit teriannianik nerisitsisarunnaaqqullugit kajumissaarnissaannut peqqutissaqarluarpugut, Ilannguaq Hansen oqarpoq.