Kattunneq, arnat persuttarneqartartut ikiorniarlugit suliniut, ullumi pingasunngornermi martsip arfernarni oqaloqatigiilluni ataatsimiittoqarpoq. Ataatsimeeqatigiinnermi kommunit tallimaasut tamarmik saqqummiinissaminnut periarfissinneqarput, ilaqutariit persuttarneqarnermik misigisaqartartut sullinniarneranni unammillernartut suunersut saqqummiutissallugit.

Sumiiffiilli ilaanni naammattumik ikiuunniarnissaq ajornakusoortarpoq.

Qeqqata Kommuniani illoqarfiit marluusut tamarmik qimarngueqanngillat. Avannaata Kommunia ataatsimik qimarngueqarpoq, Ilulissaniittumik. Illoqarfiit sinneruttut pingasut, Qaanaaq, Upernavik Uummannarlu qimarngueqanngillat.

Qimarnguiilli piusut sulisunik aamma amigaateqartarput, soorlu tarnip pissusaanik ilisimasalinnik, psykoterapeutinik, isumaginninnermi siunnersortinik assigisaanillu.

Ajornartorsiut annertooq

Nunatsinni illoqarfinni 17-iusuni illoqarfiit arfineq-marluk qimarngueqarput, tassunga politiit, peqqinnissaqarfik, arnallu persuttarneqarsimasut saaffiginnissinnaallutik. Illoqarfinni qimarnguiit saniatigut Kalaallit Nunaat nuna tamakkerlugu qimarnguiullunilu katsorsaaveqarpoq, Qeqertarsuarmiittoq Illernit, arnat meeqqallu nakuuserfigineqarsimasut tassani katsorsartissinnaallutik. Qimarnguilli Qeqertarsuarmiunut neqerooruteqanngilaq.

Saqqummiisut ilaat, Avannaata Kommuniani ilaqutariinnut immikkoortortaqarfimmi pisortaq, Ane Louise Løvstrøm isumaqarpoq kommuni amerlanernik qimarngueqarnissamik pisariaqartitsisoq.

- Ajornartorsiuterujussuuvoq arnat angerlarsimaffimminni persuttarneqartut sumukarfissaqartannginnerat, Ane Louise Løvstrøm saqqummiinermini oqarpoq.

Kommuni aningaasaliissutinik piniassalluni pilersaaruteqartoq, Ane Louise Løvstrøm saqqummiinermini ilisimatitsivoq.

Kisitsisit kingulliit takutippaat nunatsinni arnat 62 procentii aappaminnit persuttarneqarneq misigisimagaat. Inuusuttut 15-it 18-illu akornanni ukiullit 27 procentiisa anaanartik aappaminit annersarneqartoq takusimavaat tusaasimalluguluunniit.

Kommunip akisussaaffigaa

Isumaginninnermut naalakkersuisoq, Martha Abelsen (S) isumaqarpoq qimarnguiit kommunip akisussaaffigissagai.

Kommuni qimarnguinnik amigaateqaruni, nammineq pilersitsissaaq.

- Kommunalbestyrelsemi pinngitsooratik tulleriiaarinerni ilaqutarinni sullissineq ilannguttariaqaraat isumaqarpunga. Tamavitta qimarngueqarlutalu, ilaqutariinnullu sullissiveqarluta, tamaviisa pigissagutsigit nunarput akissaqanngilaq, Martha Abelsen Sermitsiaq.AG-mut oqarpoq.

Martha Abelsenili isumaqarpoq kommunini Namminersorlutillu Oqartussani suliniutit pioreersut nukittorsarneqartariaqartut, persuttaanerup annikillisinnissaa anguneqassappat.

- Illoqarfiit tamarmik ilaqutariinnut sullissiveqareerput. Taakku pillugit pilersaaruteqartariaqarpugut, sumiiffinnilu nukiit pioreersut nukittorsartariaqarpagut, Martha Abelsen Sermitsiaq.AG-mut oqarpoq.