Skip to main content

Qimangussorneqarsimasut illoqarfinnut nunaqarfinnulli agguataarneqassapput

Nuugaatsiami Illorsuarnilu innuttaasut piffissami matumani najukkaminnut utersinnaannginnerat pissutigalugu siunissami sumi najugaqarusunnerlutik aalajangissavaat

Uummannap eqqaani tassaarsuaqarnerata kingunerisaanik qimangussorneqarsimasut qanoq inissisimanerat pillugit, Naalakkersuisut siulittaasuat, Kim Kielsen (S), Qaasuitsup Kommuniata borgmesteria Ole Dorph (S) kommunimilu ingerlatsivinni pisortaq, Sivso Dorph oqarasuaatikkut peqatigalugit tusagassiortunik katersortitsipput.

Kim Kielsenip oqaluttuaraa upalungaarsimanermut ataatsimiititaliaq ujarassiuulli peqatigalugit sapaatip-akunnerata aallartilaarnerani Nuugaatsiamit Illorsuarniillu qimangussorneqarsimasut paasititsiviginiaavigisimallugit.

Ingerlariaqqinniartut

- Qaqqap nakkaannissaa suli aarlerinartoqarnera pissutigalugu nunaqarfimmut utertoqarnissaa imminut illersorsinnaanngitsoqm nassuiaatigaarput. Taakkuli piffimmi allami najugaqarallarnissartik naatsorsuutigisariaqaraat, Kim Kielsen tusagassiortunik katersortitsinermi oqarpoq.

Aalajangiineq qimangussorneqarsimasunit paasineqarlunilu eqqissiallaatigineqartoq, taassuma oqaluttuaraa.

- Taakku ingerlariaqqinnissamik kissaateqarput, Kim Kielsen (S) oqarpoq.

Uummannap eqqaani inissaqanngitsut

Qimangussorneqarsimasut arlallit Uummannap eqqaaniiginnarusuttut, Qaasuitsup Kommuniani borgmesterip, Ole Dorphip (S) oqaluttuaraa. Inissalli amigaataapput.

- Uummannap eqqaani inissiat qanoq amerlatigisut inoqannginnersut misissorsimavarput, taakkuli naammanngillat, Ole Dorp oqarpoq.

Nuugaatsiami Illorsuarnilu innuttaasut sumi najugaqarsinnaanerat, Naalakkersuisut Qaasuitsup Kommuniatali misissuleruttorpaat. Naalakkersuisut siulittaasuata ilaatigut Disko Bugtimi Upernaviulli nunaqarfii ilaatigut najugaqarfigineqarsinnaasutut eqqaavai.

Nunaqarfinni taakkunani marlunni innuttaasut kissaataat malillugit nuutsinneqarumaartut, Kim Kielsenip erseqqissaatigaa.

Aalajangertariaqartut

Nunaqarfinni taakkunani marlunni qimangussorneqarsimasut amerlanersaat Ilulissani, Aasianni Uummannamilu kollegiani atuarfinnilu najugaqarallarnertik pissutigalugu, juulip qaammataata naanerani ukiup atuarfiusussap aallartinnginnerani sumi najugaqassanerlutik aalajangertariaqarpaat.

Qimangussorneqarsimasulli qanoq kissaateqarnerlutik tunuarsimaarfigissanngikkaat, Naalakkersuisut siulittaasuata erseqqissaatigaa. Atorfigisaallli apeqqutaatinnagit tamarmik assigiimmik ikiorneqartussaasut ilanngullugu erseqqissaatigaa.

- Ulluinnarni inooriaaseq sukkanerpaamik uterfiginissaa taakkununnga pingaaruteqarluinnarpoq, Kim Kielsen (S) oqarpoq, qimangussorneqarsimasulli sakkortuumik misigisaqarsimanerat pillugu ikiorserneqarnissaat pingaarnersaasoq naqissuserlugu.

Ukiup tulliani sanaartorneq

Nuugaatsiamit Illorsuarniillu qimangussorneqarsimasut najugarisassatut toqqakkaminut apuussimalerpata, inissianik sanaartornissaq Naalakkersuisut Qaasuitsup Kommuniatalu isumagissavaat. Sanaartornerilli ukiormanna ukiunnginnerani naammassisinnaanngimmata, ukiup tulliani inaarsarniarneqarnissaat naatsorsuutigineqarpoq.

Naalakkersuisut siulittaasuata Kim Kielsenip paasissutissiaraa qimangussorneqarsimasut katillugit 151-sut, Nuugaatsiamit 74-it Illorsuarniillu 77-it.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER