Qilalugartassiineq: Siunnersuineq annertuumik sipporneqartoq

Aappaagumut qilalugartassiissutit maanna inissinneqarput. Pisassiissutit qanoq innissaat Naalakkersuisut aalajangerpaat, ukioq mannalu aamma ilisimatuussutsikkut inassuteqaatit annertuumik sipporneqaqqittussanngorput.

Pingaartumik Tunumi qernertanik piniarneq assortuussutaavoq, ilisimatuussutsikkut inassuteqaatini piniartoqannginnissaa siunnersuutaammat, akerlianik najukkami piniarnissamik annertuumik kissaateqarput.

Tunumi qilalukkat qernertat nungutaariaannaasut

Ilisimatuussutsikkut siunnersuineq Naalakkersuisut malinniarnagu aalajangerput, Tunumilu 2023-mi katillugit qilalugartassiillutik.

Nunani Avannarlerni imaani miluumasut pillugit Ataatsimiititaliaq Nammco, Tunumi qilalukkat qernertat piniarneqaannarpata nungunnissaannik navianartorsiornerannik naliliisimasut Naalakkersuisut taamaalillutik tusarnaanngilaat.

Qaqortanut teknikikkut pisassiissutit

Tamatuma saniatigut Tunumi piniartunut allamik nutaarsiassaqarpoq. Tassami qaqortartassat teknikikkut pisassiissutit 30-upput. Tunumi qilalukkanik qaqortanik pisassanut siunnersuuteqartoqanngilaq, taakku qaqutigoortuuneri nalilerneqarmata, taamaattumillu eqqissisimatinneqarlutik.

Kisianni piniartoqarsinnaaniassammat Naalakkersuisut Inatsisartunit pisassiinissamut peqquneqarput, tamannalu maanna pivoq. 1955-imit 2021-mut qilalukkat qaqortat 112-t ukiut 66-it ingerlanerini Tunumi pisarineqarsimasut, Nammco-mit nalunaarusiap takutikkaa, Inatsisartuni oqallittoqarneranut atatillugu saqqummiunneqarpoq, tassa agguaqatigiissillugu qaqortat 1,6-it ukiumut pisarineqartartut. Qilalukkat qaqortat Svalbardip eqqaaniittartut amerlanngitsut eqqissisimatitaneersut avaqquttartut, Nammco inerniliivoq.

Kitaanut tunngatillugu 2023-mi qernertat 455-t pisassiissutigineqarput. Siunnersuineq malillugu amerlanerpaamik 294-it piniarneqarsinnaapput.

Tamatuma saniatigut Kitaani qaqortat 294-it pisassiissutigineqarput.