Qilalugarniarneq: Ukioq sikuulluarmat sassisoqarluarpoq
Nunatta Avannaani qilalukkanik ulluni makkunani pisaqartoqarluarpoq, tamannalu pivoq pisassissutit ilannganngikkaluarlugit, tassami sassat pillugit malittarisassat nalinginnaasumik piniarnermit allaanerugamik.
Kalaallit Nunatta avannarpasinnerusortaani piniartut ulluni makkunani sassillutik qilagugamalluarput, qilalukkammi sikumut mattussaasimasut imaanullu avalaqqissinnaanngitsut pisarisinnaasatik tamaasa pisarisinnaatitaagamikkit.
Piniartoq Hans Niels Karlsen Innaarsunneersoq ningittakkersorluni aalisariarnikuugaluarluni aalisaleruttorlunilumi piniartoqatiminit ilisimatinneqarami "Sassat" takkussimasut, aalisariutini ningittakkat tuaviinnaq qallupallappai. Taamaaleriarluni aalisarfini qimakkasuarlugu saffinninnut ingerlaalerpoq. Ingerlaarnerlu taanna qimussimik 7 kilometerit missaanik isorartussuseqarpoq.
Apuukkami piniartoqaterpassuani Innaarsunneersut Naajaanersullu apuussulereersimasut (qimussit 20-it missaanniittut) qilalukkanillu pisaqamalereersimasut peqatigilerpai, tassanilu sassinermi qilakukkat 20-25-it pisarineqarput.
Karl-Peter sasseqataarngaartoq
45-nik ukiulik Karl-Peter Eliassen Tasiusameersoq inuunermini aatsaavissuaq sasseqataavoq qularnanngitsumillu piniartuunermini puigunaatsorsilluni. Aammami oqaluttuarpoq piniariartarfimmi tassani sassisarneq qaqutigoortorujussuusoq.
- Assut nuannerpoq, kisianni aamma assut nillerpoq. Maannakkorpiaq 32-33 graderinik issippoq, taamaammallu pisarineqartut ataasiakkaarlugit qallorpagut, taamaaliunngikkutta erngertumik qerisoorutigissagatsigit aggoruminaassitittuussaassagatsigillu, piniartoq Karl-Peter Eliassen oqaluttuarpoq.
Amalie Jessen: Suna tamarmi pissusissamisut ingerlavoq
Piniarnermut naalakkersuisoqarfimmi immikkoortortaqarfimmi pisortaq Amalie Jessen Sermitsiaq.AG-mut oqaluttuarpoq Avannaani sassineq maanna ingerlanneqartoq ajunngitsumik pissusissamisullu ingerlanneqartoq:
- Malittarisassat ersarissut najoqqutarineqarput, qanoq iliorluni qaqugukkullu piniartut sassinissaminnut akuersissummik tunineqassanersut malittarisassat naapertorlugit qilalukkat sikumit anillassinnaajunnaaqqasut pisarineqarsinnaalertarput. Tamanna pitinnagu piniartut uppernarsaqqaartussaavaat qilalukkat imaanut sikuunngitsumut anillaffissaqanngitsut. Tamanna pereerpat naalakkersuisoqarfimmit akuersissummik pissarsereerunik aatsaat pisaqarlutik aallartissinnaanngortarput, Amalie Jessen oqaluttuarpoq.
Tassa piniartut sunngiffimminnilu piniartartut akuersissummik tunineqareernermik kingorna qilakukkanik mattussaaqqasunik pisaqarsinnaatitaalertarput, taakkulu pisarineqartut pisassanit nalinginnaasunit ilanngaatigineqarneq ajorput, taamaattorli piniartut pisussaaffeqarput mattaannaanngitsoq, neqilli aamma ilanngullugit angerlaanneqartussaapput. Pingaartumik mattak naggueqatigiit Inuit akornanni piumaneqarluarlunilu neriumaneqarluartuuvoq, sassinermili qilalukkap nerineqarsinnaasortai tamaasa ilanngullugit angerlaanneqartussaallutik.