Qilaatersornermik ilisimatusarsimasoq toqusoq
Pauline Motzfeldt Lumholt 77-inik ukioqarluni toquvoq. Arfinilinnik qitornaqarpoq, marlunnillu qitornavissiaqarluni.
Erinarsoqatigiinni erinarsortartoq, erinarsoqatigiinnik aqutsisartoq qilaatersornermillu ilisimatusarsimasoq, Pauline Motzfeldt Lumholt sivikitsumik napparsimareerluni 22. januar 2023 toquvoq. 77-nik ukioqarluni toquvoq. Paniusup Aviaja Lumholtip tamanna Sermitsiaq.AG-mut uppernarsarpaa.
Pauline Motzfeldt Lumholt qilaatersornermik ingerlataqartuunini, kalaallillu kulturiannik eriaginnittuunini ilisimaneqaatigivaa.
Danmarkimi ukiuni arlalinni kingullerni najugaqarsimavoq.
Kulturikkut nersornaatisisoq
Pauline Motzfeldt Lumholt palasimut Bent Lumholt 1967-imi katippoq, arfinilinnillu qitornartaarluni.
Pauline Motzfeldt Lumholt qilaatersornermik nunarsuarmi sumiiffinni arlalinni takutitsisarsimavoq. Qilaatersornerup eriagineqarnissaanik, atorneqaannarnissaanillu suliniuteqarnera nersorniarlugu, Namminersornerullutik Oqartussat 1995-imi kulturikkut nersornaammik tunivaat.
- Qilaatersorneq uummammiorilluinnarsimavaa, piareersarsimaqqaaranilu erinarsorsinnaaneq atorlugu Kivikkat peqatigalugit qilaatersortarsimavoq erinarsorlunilu. Jazzimik nipilersortartoq qallunaaq Kresten Osgood Jonas Stampe nipilersuutinillu arlalinnik atuisartoq tyskeq Hartmut Gerken peqatigalugit Kalaallit Nunaanni tusarnaartitsisarsimavoq 2022-milu saqqummersitseqatigalugit, paniusoq Aviaja Lumholt Sermitsiaq.AG-mut ilisimatsivoq.
Erinarsoqatigiinni aqutsisoq erinarsoqatigiinniittorlu
Pauline Motzfeldt Lumholt Avaakkunnut erinarsoqatigiinnik aqutsisuusimavoq. Taanna aamma uini qitornanilu peqatigalugit juullisiutinik saqqummersitsisimavoq - Lumholtikkut-nik taallugu.
Pauline Motzfeldt Lumholt DR-imi nunatsinnut juullimut pilluaqqussutaani 2022-mi peqataavoq, inuillu kulturiannik kingornutaanillu soqutigisaqartuunini pillugu oqaluttuarluni.
Christians Kirkemiit ilisineq arfininngorneq 28. januar nal. 12.30 ingerlanneqassasoq, ilaqutaasut ilisimatitsipput.