qilaatersorneq

Qilaat kinaassusersiortuunngilaq

Inngertartut isumasioqatigiinneranni kialluunniit qilaammik atuisinnaanera isumaqatigiissutigineqarpoq – aamma kitaamiunit

Kitaamiu Anda Poulsen inngertartut isumasioqatigiinneranni Katuami

Nunatsinni qilaatersortartut nuannarineqarnerpaat sisamanngormat ualikkut Nuummiunik Katuami nuannatsitsipput. Qilaatersortartut, inngertartut, immertartut isumasioqatigiinnerata naggataarnersiorneranni tamanna pivoq. Isumasioqatigiit ullutsinni qilaatip inissisimanera eqqartorpaat nuannaarutigalugulu nalunaarutigaat inngerneq, qilaatersorneq nunasiaataasimanerup kingunerisaanik pusimajunnaassasoq naasutullu sikkilissasoq.

-Upperisaq akueraarput kisianni ingerlariaqqissinnaanerput tamatta pigivarput taamasiussaagullu inngerutinik aallussilluta. Qilaat kinaassusersiunngilaq, inngertartut ataatsimeersuarneranik aaqqissueqataasoq AndaPoulsen, taamatut oqarpoq.

Nunarput nunasiaataalernerata kingunerisaanik kitaani qilaatip ilusaa, inngerutit katuariaatsillu puigorneqarput. Avanersuarmili nunattalu kangiani tamakku tammatsaalineqarnikuupput ileqqutoqqallu arlallit suli piullutik. Nunatta sineriaani inngertartut ataatsimoorlutik kattupput inngernerullu siunissaa pilersaarusiuullugu:

- Isumalluarnartorujussuarmik oqariartuuteqarpugut: qilaat kitaani atorsinnaavarput. Avanersuarmiusut aamma nunatta kangiamiusut uagut inngersinnaavugut aamma maani kitaani katuariaaserput nammineq uummanterput naalaarlugu nassaarissavarput. Tamatta pigigatsigu siunissami qanorsuaq ittoorinagu atorsinnaavarput. Kitaani piujuarsimavoq toqqortamik, angerlarsimaffinni ataasiakkaani inngertarsimpput, toqusimanngilaq, paasivarput sunaaffa aamma taam peqartigaluta, Anda Poulsen nuannaarluni oqarpoq.

Inngertartut immertartut 25-it missaaniittut isumasioqatigiinnermi peqataapput, isumasioqatigiinneq tips aamma lotto-mik tapiiffigineqarpoq. Anda Poulsenip neriuutigaa nunatsinni inngertartut immertartut siunissami peqatigiiffiliornissaat. Inngernerup silarsuaani pisussaq tullinnguuttoq Illuerunnerni, Kangerup eqqaani pissaaq 4. aamma 5. juli, Hans Egedep nunaqaqqaarfiani inngertoqarumaarmat.

Powered by Labrador CMS