Qernertat pisassat amerlineqarnerat Lyngep taperserpaa
Qimusseriarsuarmi aamma Qeqertarsuup Tunuani qilalukkat qernertat pisassiissutigineqartut katillugit 40-nik amerliniarlugit Naalakkersuisut aalajangernerat Demokraatinit akuerineqarpoq.
Naalakkersuisut biologit innersuussutaasa akerlianik iliorlutik qilalukkat qernertat pisassiissutigineqartut Demokraatinit akuerineqarlutik amerlivaat. Demokraatit naalakkersuisoqatigiinnut tapersersortaapput.
Aalisarnermut piniarnermut tunngasunut oqaaseqartartoq Steen Lynge, Sermitsiaq.AG-mut taama ilisimatitsivoq.
Piniartut tusaaneqassapput
- Piniartut tusaaniartariaqarpagut, siunissami aamma pisassiissutit aalajangersarnerinut tunngatillugu ilaatinneqarnerusariaqarput. Biologit innersuussutaat kisiisa aalajangiinermi atortassanngilagut, Steen Lynge oqarpoq.
Kisianni aamma pisassiissutit nungussimagaluarpataluunniit, pisassiissutit aalajangiunneqarsimasut malillugit piniartut ukioq naallugu atasinnaasumik aningaasaqarnertik pilersaarusiornissaanut akisussaaffigigaat, taassuma nassuerutigaa.
Aalajangerpugut
- Pisassiissutit qaffanneqarnissaanut aasaq kissaateqartoqarpoq. Maanna aalajangerpugut, taamaalilluni qaffaasoqaqqinnissaanik piumasaqarluni periarfissaqarnani, Steen Lynge ilisimatitsivoq.
Ilisimatuussutsikkut suleqatigiissitami JCNB-mi, Canadap aamma sinniisoqarfigisaani, Namminersorlutik Oqartussat siunnersorneqarput, qilalukkat qernertat amerlassusaasa qaffannissaanut periarfissaq qanoq annertutiginersoq. Ukioq manna peqassutsip siuariartornissaanut 70 procentimik periarfissaq Namminersorlutik Oqartussat naammagaat. Pisassiissutit amerlineqarnissaannut ippassaq aalajangertoqarneratigut, peqassutsimut kinguneqarsinnaanera annertusineqarpoq, tamannalu piujuaannartitsisumik tunngaveqarluni piniarnermut periusissiamut tulluanngilaq.
Kim Kielsenip ukiup ingerlanerani Qanoruumi oqaatigaa, qilalukkat qernertat pisassiissutigineqartut amerlinissaannut tunngavissaqanngitsoq. Tassa oqariartuut ukioq tamaat atuutinngitsoq.
Aningaasat amerlanerusut
Siunissami pisassiissutit eqqortut qanoq amerlatiginissaat nalilersorniarlugu aningaasanik amerlanerusunik immikkoortitsisoqarnissaanut piumasaqartoqarsimasoq, Steen Lynge ilisimatitsivoq, taamaalilluni piujuaannartitsisumik sinaakkusiisoqarsinnaammat.
- Piniarnermut ataatsimiititaliap isumaqatigiittup illersorneqarsinnaasumik pisassiissutit allanngortippaat, Steen Lyngep tamanna ilanngullugu oqaatigaa.