Qerititsivinni umimmaap neqeqarnissaanik PN piumasaqarpoq
Pisiniarfinni umimmaap neqaanik pisisinnaaneq periarfissaasariaqartoq, Jens Napaattooq isumaqarpoq.
Umimmaap neqaa pisiniarfiit qerititsivianniileqqissaaq. Partii Naleqqap politikkikkut oqaaseqartartua, Jens Napaattooq taama isumaqarpoq, tassungalu tunngatillugu §37 atorlugu arlalinnik apeqquteqaateqarluni.
Brugsenimi Pisiffimmilu umimmaap neqaanik aserortikkanik, umimmammik pølselianik aggukkanillu ukiut marluk matuma siorna pisiassaqartarsimagaluarpoq. Siornalu taamaattoqarunnaarpoq. Suliffeqarfiup Lilleholm Foodsip 2016-imi Kangerlussuarmi umimmaat tuttullu neqaannik tunisassiorneq, Arctic Green Foodip siornatigut ingerlassimasaa, ingerlakkaluarpaa.
Lilleholmilli Namminersorlutillu Oqartussat nioqqutissiornermi tapissap qanoq annertutiginissaa isumaqatigiissutigisinnaanngilaat, neqinillu agguilluni nioqqutissiorneq akisuallaalersimalluni. Taamaammat umimmaap neqaat Kangerlussuarmi 2017-imi 2018-imilu tunineqarsinnaanngillat. Neqi umimmaap neqaanik 2018-imi aamma tunitsiviusinnaasimanngilaq. Taamaasilluni pisiniarfinni umimmaap neqaanik siorna pisiassaqanngilaq.
Jens Napaattooq isumaqarpoq nioqqutissiornermi tapit misissorneqartariaqartut, aammalu Brugseni Pisiffillu toqqaannartumik piniartunut pisisinnaalertariaqartut.
- Umimmaat neqaannik piserusuttoqartaraluarpoq, siornatigummi Brugsenip ukiumut nersutit 200-t missaanniittut tunisarsimagaluaramikkit, Jens Napaattooq apeqqummini tunngavilersuivoq.
Nammineq pilisinnaaneq
Niuertarfiit taakku marluk namminneq neqaarniaqartut, taakkulu neqinik eqqiluisaarlutik suliaqarsinnaasut, taanna isumaqarpoq.
Pingaarnertulli qulakkeerumavaa Kangerlussuarmi tunitsiviup ammaqqinneqarnissaa.
- Ukiup pingajussaa Kangerlussuarmi tunitsivik matoqqatinneqarpoq. Tunitsivimmi suliassaqartoqannginnera aamma umimmaat imaluunniit tuttup neqaanik tunisisoqarnissaanik periarfissaqanngimmat, tunngavilersuummini allassimavoq.
- Piniartutut inuussutissarsiuteqartortagut pisaminnik tunitsivissaannik periarfissaqartariaqarput taamatullu nunatta immitsinnut neqaatitsinnik pilersornerunissarput pisariaqartippaa. Soorluttaaq aamma suliassaqartitsineq taamatut ittoq.
PN-mi politikkikkut oqaaseqartartup ilanngullugu paasiumavaa sooq Neqi 2018-imi umimmaap neqaanik tunitsiviusinnaasimannginnersoq, naak 2017-imi tunitsivigineqartaraluarluni.