Qerititsiviit ulikkaaqqammata aalisakkanik tunisiniarneq ajorsisinnaavoq
Avannaani aalisartut qerititsiviit ulikkaaqqammat aalisakkanik tunisiniarnerat ajornarsisinnaavoq, silalu pissutaalluni Royal Artic Line aalisakkanik aallersinnaanani.
Annonse
Ikerasammi qerititsivik ulikkaarsimavoq, qularnanngitsumillu qanittukkut aamma nunaqarfinni allani qerititsiviit ulikkaaqqalersimassallutik, Royal Arctic Line ilisimatitsivoq.
Aalisakkat nillertumiitinneqarsinnaanngippata ”tunisisinnaajunnaarnermik kinguneqarsinnaavoq”.
Siku akorngutaasoq
Uummannap sulluani sikup aserortersimanerata Uummannamut palitsinik ukioq manna assartuisinnaannginneq pissutsinut ajornerulersitsivortaaq, umiarsuaatileqatigiiffik taamatut inissisimasoqarneranik ima allattoq ilisimatitsivoq:
- Sikup periarfissaqartileriarpatigut qerisunik aallernissatsinnut piareersimavugut. Sikoqarnera silallu qanoq innera malinnaaffigeqqissaarparput, periarfissaqaleriarpallu pisinnaasarput atorlugu qerititsivinnik imaajaassalluta.