Qeqqata
Qeqqata Kommuniata suliniutinut aqutsisutsialaat akissarsitipaat
Suliniutinut aqutsisut tamarmik immikkut 100.000 koruuninik pissarsitinneqarput, taakku kommunini suliniutit ingerlateqqinnissaannut atugassaapput
Qeqqata Kommunia kommunimi suliniutinut aqutsisunut marlunnut akissarsititsivoq, taakku atuilluartuunermut suliniutinut ingerlatsisuupput.
2012-mili kommunalbestyrelsi Atuilluartuuneq 2020 anguniagassatut aalajangerneqarmalli suliniutit assigiinngitsut 34-t ilinniartitaanermut, inunnik sullissinermut avatangiisinullu tunngasunik aallartereerneqarsimapput.
Taakkununngalu suliniutinut aqutsisuusut, kommunip taamatut nersorniartarpai.
Marluk tunisittut
Pingasunngornermi januaarip 27-ani Qeqqata Kommuniata suliniutinut aqutsisutsialaat pissarsitippai. Suliniutinut aqutsisutsialaat marluk, illup iluani avataanilu suleqateqarluarsimanermikkut malunnaateqarluarsimasut, suliniutiminnullu atatillugu annertuumik unammillernartunik nalaassisarsimagaluarlutik ilungersuullugu ingerlatsisimasut pissarsitinneqarput.
Tunissutissarsisut
Akissarsianik tunineqartut ukuupput:
-
Ole Thor Hermansen, Qeqqata Kommuniani Maniitsumi Teknikkimut Avatangiisinullu Immikkoortortami pisortaq, suliniummut Atuilluartumik nukissiornermut aqutsisoq, tamatumunnga atatillugu Maniitsumi Kilaaseeqqap atuarfiani kommunip allaffianilu seqinisaatinik ikkussuisitsisoqarnikuuvoq.
-
Ulrik Motzfeldt-Skovgaard, Qeqqata Kommuniani Sisimiuni qarasaasialerivimmi pisortaq, kommunimi tamarmi iPad-it atuutsilersinneqarnissaannut suliniummut aqutsisoq.
Suliniutinut aqutsisutsialaat taakku marluk, atuilluartuunissamik suliniutimi ingerlateqqinnissaanut tamarmik immikkut checkimik 100.000 koruuninik naleqartumik tunineqarput, ilutigalugulu eqqumiitsuliaq piniartoq unaalik tunissutisiaralugu.
Nersornaatit
Ilaatigut atuilluartuunissamik pimoorussillutik suliniuteqartut nersorniarlugit, Qeqqata Kommuniatalu 2020-mi atuilluartuunissaminik suliniuteqarnera malunnartinniarlugu, ukiut tamaasa suliniutinut aqutsisutsialannik toqqaasoqartarpoq.
Suliniutinut aqutsisutsialannut aappassaa pissarsisitsisoqarpoq, 2014-imilu suliniutinut marlunnut aqutsisuusut suleqatigiillutik meeqqeriveqarfinni angajoqqaat akisussaaqataanerat suleqatigiinnerallu pimoorullugu tunuliaquttat ataatsimiittarnerat kiisalu siumoortumik iliuuseqartarneq aqqutigalugit suliniuteqarfigisimavaat.
Meeqqerivinni digitaliseriineq ingerlanneqarsimavoq iPads-ilu aqqutigalugu meeqqat atualernissaannut piareersartinneqartarsimallutik.
Atuaruk: Qeqqata Kommunia atuilluartuunissamut aningaasaliivoq