Qeqqata Kommunia: Suleqatigiinnerup nutaap meeqqat inuusuttullu akornanni inuulluataarneq peqqinnissarlu siuarsaaffigissavai
Qeqqata Kommuniata, Kalaallit Nunaanni Center for Folkesundhedip Paarisallu suleqatigiilernerat, Islandimi ukiuni 20-ni kingullerni pinaveersaartitsinermut suliniuteqarnikkut misilittagarilerneqarsimasunit tunngaveqarpoq.
Qeqqata Kommuniani meeqqat inuusuttullu peqqissusaat inuulluataarnerallu siuarsaaffiginiarlugu, kommuni Kalaallit Nunaanni Folkesundimik Paarisamillu suleqateqalersimavoq.
Ta,amma kommunip nittartagaani atuarneqarsinnaavoq.
Qeqertamit sanilerisamit isumassarsiaq
Suleqatigiinnissap siunertarivaa, Kalaallit Nunaannut tunngasumik ataatsimut suliniuteqarneq, suliniummi ukiuni 20-ni kingullerni Islandip pinaveersaartitsinermut suliniuteqarnikkut misilittagai isumassarsiorfigineqassapput, taamatullu aamma Qeqqata Kommuniani meeqqat inuusuttullu akornanni inuulluataarnerup peqqinnissallu siuarsarneqarnissaa anguniarneqassalluni.
- Suleqatigiinnissamik isumaqatigiissut Paarisami inuiaat peqqinnerulernissaat pillugu suliniummi Inuuneritta III-mi nutaajuvoq, tassani ataatsimut inuunerissaarnerulernissap pilersinnissaa aallaaviulluni, Paarisami immikkoortortami, Pitsaaliunermut Isumaginninnermullu tunngasunut Aqutsisoqarfimmi pisortaq Ditte Enemark Sølbeck ilaatigut kommunip nittartagaani oqarpoq.
Suliniutit ataatsimoorussat Kalaallit Nunaanni 1994-imiilli ukiut sisamakkaarlugit HBSC-mik misissuinernik ingerlanneqartartunit Meeqqanik atuartunik misissuinernit paasisanik aallaaveqassapput.
- Illuatungeriit misissuinermi inerniliussat pitsaaliuinermi anguniagaqartumik suliniuteqarnermut atorneqarsinnaanissaat kissaatigaat. Isumasioqatigiinnerit workshoppillu arlallit aqqutigalugit kommunimi immikkoortut assigiinngitsut akuutinneqarsinnaapput, taamatullu aamma Qeqqata Kommuniani innuttaasut pitsaaliuinermik suliniutinik ineriartortitsinermi ingerlatsinermilu akuutinneqarsinnaassallutik, kommunip nittartagaatigut ilisimatitsissutigineqarpoq.
Isumaqatigiissut ukiuni marlunni atuuttussaq
Borgmesterip Malik Berthelsenip (S) suleqatigiinnissaq ukioq 2022 ilanngullugu atuuttussaq qilanaaraa.
- Neriuutigaaralu, kommunip suliniutaa tigulluarneqassasoq, taamatullu aamma anguniakkamik piviusunngortitsisinnaassalluta, meeqqanik inuusuttunillu sullissisut angajoqqaat peqatigalugit kivitseqatigiillutik meeqqat ukiut 10-20-lluunniit qaangiuppata peqqissutut nuannaartutut ilisimaneqalernissaat anguniarlugu, taanna oqarpoq.
Qeqqata Kommuniani meeqqanik atuartunik misissuineq 2020-mi aggustimi septemberimilu ingerlanneqaqqipput, taakkulu pitsaaliuinermut suliniummi suleqatigiissutiginiakkami siullermi tunngavilersuutitut atorneqassapput.