Qeqqata Kommuniani miliuunilikkaanik atuivallaartoqarsimasoq
Kommunip 2021-mut missingersuutaani 43 millioner koruuninik atuisoqarsimanissaa naatsorsuutigineqarpoq.
Qeqqata Kommuniani kommunalbestyrelsi juullinngitsiartoq ataatsimiimmat, kommunip aningaasaqarnerata ernumanartortaqarnera erseqqissaassutigineqarpoq.
Ingerlatsivimmit nassuiaatigineqarpoq, kommunip 2021-mi ingerlatsinerani 43,4 millioner koruuninik atuivallaartoqarnissaa naatsorsuutigineqartoq. Misissuisimanerit siulliit takutissimavaat, 33,3 millioner koruunit aningaasarsiassanik atuivallaarsimanermit tunngaveqartut.
Immikkut ittumik ernummatigineqartoq tassaavoq, 2019-imi kommunip ingerlatsinermi aningaasartuutigisimasaasa 700 millioner koruunit missaanniit 2021-mi 800 millioner korunnit missaannut qaffariangaatsiarsimanerat.
Ingerlatsinermi aningaasartuutaasartut qaffakkiartornerat ernummatigineqartoq
- 2019-mi sanaartornermut aningaasartuutit ilanngunnagit inernera 137 millioner koruuniusut, 2021-mi 33,7 millioner koruuniunera ernumanartoqarpoq. ingerlatsinermut aningaasartuutit qaffariaateqarnerat ernumanaateqarpoq, ingerlatsivik aningaasaqarneq pillugu allappoq.
2021-mi kommuni amigartooruteqarujussuassasoq naatsorsuutigineqarpoq. Taamatut ineriartortoqarnera ingerlaannassappat kommuni ajornartorsiuteqalissasoq, oqaatigineqarpoq:
- 2021-mut inernera 105 (92) millioner koruuninik amigartooruteqarnissaa naatsorsuutigineqarpoq, 2019-imi 58,6 millioner koruuniusoq, ingerlatsivik allappoq, nangillunilu:
2022-mut annikinaaraluni missingersuusiortoqarsimasoq
- Ukiumi inernerit ajorseriaateqarnerinut 2021-mi sanaartornermut immikkoortortami sammisat annertusingaatsiarsimanerinik patsiseqarpoq, taannalu 126 millioner koruuninik naleqassalluni, 2019-imi 79 millioner koruuniusoq. Kommuni annertuunik aningaasanik tigoriaannaateqarpoq, ingerlatsinermulli aningaasartuutit qaffasissorujussuit ingerlaannassappata, ukiualuit ingerlanerini kommunimut ingerlatsinikkut ajornartorsiortitsilissapput..
Ingerlatsivik naapertorlugu, 2022-mi aamma ajornartorsiortoqalissaaq, missingersuusiat naammanngilluinnarmata. 2022-mut annikinaakkanik missingersuuteqarluni aallartittoqassaaq, 2021-mi ingerlatsinermut aningaasartuutigivineqarsimasunut 800 millioner koruuniusunut sanilliullugu, 2022-mut ingerlatsinermut missingersuutit
750 millioner koruuniummata.
Kommunalbestyrelsip aningaasaqarneq pillugu nalunaarusiaq tusaatissatut tigusimavaa.