Qeqqata Kommuniani ineqarnermut akigititat qaffanneqassasut
Maniitsumi Sisimiunilu Ini A/S aqqutigalugu laqutariinnut arlalinnut aamma ilaqutariinnut ataatsinut inissiani affarleriinnilu najugaqarneq akisuenerulissaaq. Erik Jensenili (S) aalajangiussamut akerliusimavoq.
Qeqqata Kommuniani kommunalbestyrelsimi ilaasortat amerlanersaasa aalajangersimavaat, Maniitsumi Sisimiunilu Inip inissiaateqarfigisaani sisamaasuni marluk najugaqarfigineqarnerinut akigititat to procentimik qaffanneqassasut.
Ilaqutariinnut arlariinnut ataatsinullu inissiat affaleriiusullu akitsuiffigineqassapput, inissiat allat najugaqarfigineqarnerat akitsorneqassanngilaq, Qeqqata Kommuniani kommunalbestyrelsip ataatsimiinneranit kingullermit imaqarniliami tamanna atuarneqarsinnaavoq.
Isumaqataanngitsoq
Kommunalbestyrelsimi ilaasortaq Erik Jensen (S) qaffaasoqarnissaanut kisiartaalluni isumaqataanngilaq. Taassuma inissiani najugaqarnerup qaffaaffigineqarnissaanut sooq isumaqataannginnini Sermitsiaq.AG-mut imatut nassuiarpaa.
- Inissiaatileqatigiiffik aserfallatsaaliinissamut naammattunik aningaasaateqareerpoq, aserfallatsaaliinissamummi 20 millioner koruunit missaanniittunik aningaasaateqarpoq. Aamma ilaqutariit akunnattumik aningaasarsisartut soraarninngornerillu. inissiani qaffaaffigineqartussani najugaqarput. Taamaammat aalajangiinerup sumut attuumassuteqarnera takusinnaanngilaara, taanna oqarpoq.
Qeqqata Kommuni najugaqarnissaq pilerinartuutikkusukkaanni, taamatut aalajangiinaveersaartoqartariaqarpoq, taanna oqarpoq.
- Ineqarnermut akiliutigineqartartut qaffasereerput, aserfallatsaaliinissamut naammattunik aningaasassaqarpoq, taava sooq taamatut aalajangiisoqarpa? Innuttaasunut atugassarititaasut pilerinartuunissaat qulakkeertussaavarput, taamaammat taamatut aalajangeroqarner uggornarpoq, taanna oqarpoq.
Qaffaassut aappaagu atuutilissasoq
Attartornermi akigititat qaffanneqarnerisigut ingerlatsinermi ataavartumik aningaasartuutit saniatigut, siunissami aserfallatsaaliinissanut aningaasat immikkoortinneqassapput, soorlu ilaatigut pilersaarutaasunik kiisalu piffissat ingerlanerini aserfallatsaaliinermut, nuuttoqartillugu inissiallu attartorneqannginnerini iluarsartuussinernut, nuuttoqartillugulu annaasanut matussutigineqartassallutik, imaqarniliami ilisimatitsissutigineqarpoq.
Allannguutit atuutsilersinnagit, attartortut qaammatinik pingasunik sioqqutsilluni ilisimatinneqartussaapput.