Qeqqata Kommuniani atuartut eqiasuitsut akissarsitinneqartut

Maligassiuisarnerup kinguneqarluartarnera Qeqqata Kommuniata upperaa, taamaattumillu meeqqat atuarfiini atuartut atuartoqatiminnut isumassarsisitsisinnaasut maligassiuisinnaasullu ersarissarneqarnissaat anguniarlugu.

Tamanna tunuliaqutaralugu atuartunut eqiasuitsunut akissarsisitsisarnissaq pillugu kommunip namminersorlutik inuutissarsiutillit suleqatigilerpai. Tamatuma saniatigut Sisimiuni Maniitsumilu meeqqat atuarfiini ilaatigut soraarummeertut akornanni immikkut pingasut akissarsitinneqartarnissaannik Qeqqata Kommunia nammineerluni pilersitsivoq.

Atuartumut agguaqatigiissillugu angusarinnerpaamut, atuartumullu ikinnerpaanik atuanngitsoorfeqarsimasumut akissarsisitsisoqarpoq. Akissarsiassaq atuarfiit namminneq toqqagaannut tunniunneqarpoq. Akissarsiassat taakku pingasut 3000 koruuninik naleqarput. Illoqarfinni meeqqat atuarfiini ukiup atuarfiusup ingerlanerani ikinnerpaamik atuanngitsoorfeqarsimasoq 500 koruuninik akissarsitinneqartassaaq.

Atuartunut pingasunut qarasaasiat

Inuutissarsiutillit qanimut suleqatigineqarnerisigut, Sisimiuni Kalaallit Nunaanni Sulisitsisut ukioq-mannamit ukiut tulliuttut sisamat ukiut tamaasa 7. klassimi atuartunut piumasaqaatinik naammassinnissimasunut, soorlu piffissaq eqqorlugu atuariartortarsimasunut, napparsimasimanngikkunik napparsimarpiarsimanngutsunut il.il. pingasunut qarasaasianik tunissuteqartassapput. Tamatuma saniatigut 8. klassimi atuartuni atuartut marluk karakteriminnik pitsanngoriaateqarsimanerpaanut atisaarniarfik Anuni tunissuteqartassaaq. Atisat attariit Inuit Quality clothes tunnissutigineqarput.

Sisimiuni inuutissarsiutillit isumaqatigiissusiorfigineqarmata, Sisimiuni GE-mi siulittaasup aamma Anuni-mit Kristine Grønvold Samuelsen-imit oqaatigineqarpoq:

Sulilernissamut pingaaruteqartoq

- Suliffeqarfinni namminersortuni/pisortat suliffeqarfiini inuusuttut sulilertillutik, piffissaq eqqorlugu kiisalu nammineq avatangiisillu naammaginartitaannik suliakkiunneqartut naammassineqartarnissaasa pingaarutaanik ilikkarsimanissaat pingaaruteqarpoq. Taamaalilluta akissarsititsisarnikkut takutikkusupparput, pisinnaasut piumassuseqartullu akissarsitinneqarsinnaasartut, taamatullu anguniakkat angunissaannut pikkorinnerpaajusariaqanngitsoq.

Atuartut ataasiakkaat tapersersorneqarnerisa saniatigut, illoqarfinni nunaqarfinnilu atuarfinni atuaqatigiitsialaat kommunip aamma tapersersorpai. Uani assersuutigalugu atuaqatigiit annikinnerpaamik atuanngitsoorsimasut, paasisassarsiorlutik angalanissaminnut imaluunniit klassefest-ernissaminnut 10.000 koruuninik tapiiffigineqarsinnaapput. Tamatuma saniatigut kommunimi atuaqatigiit angajoqqaaminnit peqataaffigineqarnerpaasut, paasisassarsiorlutik angalanissaannut kommunip 25.000 koruuninik tapiiffigisassavai.

Qeqqata Kommuniani Ilinniartitaanermut, Peqqinnermut, Sunngiffimmi sammisanut Kultureqarnermullu ataatsimiititaliap siulittaasuata Evelyn Frederiksenip suliniut tapersersorpaa:

- Suminngaanneerneq apeqqutaanngilaq

- Malinnaasinnaagaanni suminngaanneerneq apeqqutaanngilaq, tamanna atuarnermik nakkutiginninnikkut, akisussaaffimmillu tigusinikkut nammineq anguniagassaavoq. Taamaattumik atuartunut piumasaqartalernissarput piffissanngorpoq, illuatungaanilu tunniussilluarsimanerinut akissarsisitsinikkut uppernarsaalluta. Qularinngilluinnarpara suliniutit taakku Qeqqata Kommuniani nuannersumut saatsitsilissammata, taamak Evelyn Frederiksen oqarpoq, erseqqissaatigalugulu akissarsisitsinerit taakkuinnaasassanngitsut:

- Aningaasaliissutit affaat maligassiuisunik erssarissaanissamut atorneqassapput, assersuutigalugu maligassiuisoq oqalugiartussarluunniit kommunimi atuarfinnut angalaartillugu, atuartunullu isumassarsisitsisussatut saqqummiisittarlugu”, Evelyn Frederiksen oqarpoq.

Powered by Labrador CMS