Qeqqata Kommuniani atortorissaarut nutaaq sullissisarnermik oqilisaassissaaq
Qeqqata Kommunia sulianik suliarinnittarnermi kommunini siullersaalluni nutaamik atortorissaaruteqalersimavoq. Nutaamik atortorissaaruteqalernermi meeqqanik inuusuttunillu sullissisarnerup nukittorsarneqarnissaa anguniagaavoq.
Qeqqata Kommuniani innuttaasut piffissami kingullermi kommunip atugarissaanermut immikkoortuani innuttaasunik sullissisunik oqaloqatiginninniarnerminni nalinginnaasumit sivisunerusumik utaqqisariaqarsinnaaneq malussarfigisinnaasimassavaat.
Sullissisarnermi aaqqissuussaanermut nutaamut ikaarsaaleruttoqpoq, sullissisartullu ikaarsaariarnermut atatillugu pikkorissarneqarsimallutik.
Qeqqata Kommunia nittartakkamigut taamatut ilisimatitsissuteqarpoq.
Qeqqata Kommunia nunami kommunini siullersaalluni aaqqissuussaanermut nutaamut ikaarsaariarpoq. Kommunit allat sisamaasut meeqqanik inuusuttunillu sullissinermi sulianik allagaatinillu aqutsissutmmut Get Organized-mut kingusinnerusukkut ikaarsaariassapput.
Danskit/kalaallit meeqqanik inuusuttunillu sullissisarnerup nukittorsarneqarnissaanik suleqatigiinnerisa ilaatut nutaamik aaqqissuussisoqarsimavoq.
Suleqatigiinnissamut isumaqatigiissummi kommunit qanoq peqataanissaannik anguniagaq imatut erseqqissarneqarpoq:
- Kommunini meeqqanut inuusuttunullu tunngasuni sullissisarnerup pitsanngorsaavigineqarnera. Meeqqat ilaqutaasullu atugarliortut pisariaqartitaannik ikiorneqassappata kiisalu sumiginnaaneq atornerluinerlu piffissaagallartillugu unitsinneqassappata sullissisoq pikkorissoq aalajangiisuulluinnarpoq, nittartakkami allassimavoq.
Sullissinermi ataatsimoortumik periuseqarneq
Isumaqatigiissutip timitalersorneqarnerata sullissinermi kommunini periutsit ataatsimoortut atuutsinneqalernerannik inerneqartussaavoq, kommunit tallimaasut taamaalillutik tamarmik ataatsimut periaaseqalertussaassallutik. Tamatumunnga peqatigitillugu sullissisut pisortallut pikkorissartinneqassapput.
Qeqqata Kommuniani atugarissaarnermut pisortap, Martha Lund Olsenip ilisimatitsissutigaa, piffissami qaammatinngulersumi sullissineq pisarnermit arriinnerusimasoq, aammalu siunissami qaninnermi suli pisarnermit arriinnerusinnaasoq, aaqqissuussaanermut nutaamut ikaarsaarneq ingerlanneqaleruttormat, Qeqqata Kommunianit ilisimatitsissutigineqarpoq.