Skip to main content

Qeqqata Kommunia: Meeqqat pillugit nalunaarutiginnittarnerit marloriaatinngungajattut

Qeqqata Kommuniani meeqqanik nalunaarutiginnittarnerit amerleriarneri ajunngitsumik ingerlanertut nalilertariaqarput. Nalunaarutiginninnerimmi amerlisimanerisa takutippaat meeqqat sumiginnarneqartut pinngitsaalineqartulluunniit pillugit ilisarnaatit ilisimaneqarnerulersimasut.

Qeqqata Kommuniani meeqqat inuusuttullu pillugit nalunaarutiginnittarnerit amerlingaluttuinnarput. Ukiut pingasut ingerlanerini nalunaarutiginninnerit marloriaatinngungajassimapput.

Qeqqata Kommuniani kommunimi pisortaanerup, Paneeraq Olsenip, nuannaarutigaa kommunimi eqqummaarittornerulersimanera.

- Eqqumaffigineqartussat sulisunit ilisimaneqarnerulersimanerat isumaqarpunga ajunngitsuusoq, Sermitsiaq.AG-mut oqarpoq.

Marloriaatinngortut

Pingaarnertut Sisimiuni amerlanerusut nalunaarutiginnittoqartalersimavoq. 2016-imiit 2018-imut nalunaarutiginninnerit 205-inik amerleriarput. Piffissami tassani Maniitsumi nalunaarutiginninnerit taama amerleriartigisimanngillat. 2016-imi 160-it nalunaarutigineqarsimapput, 2018-imi 188-it nalunaarutigineqarsimallutik.

Sisimiuni ukiut malillugit nalunaarutiginninnerit ima isikkoqarput:

  • 2016: 210
  • 2017: 369
  • 2018: 415

Maniitsumi nalunaarutiginnissimasut ima amerlatigipput:

  • 2016: 160
  • 2017: 180
  • 2018: 188

Nalunaarutiginninnerit amerleriarujussuarnerannut pissutaanerpaavoq meeqqat pisinnaatitaaffii pillugit sullissiviup MIO-p angalanermini nalunaarusiaata 2017-imeersup kingunerisaanik kommuni suliniuteqalersimammat. Kommuni Danmarkimi Herning Kommunimut paasisassarsiorluni angalasimavoq. Herning Kommunemi meeqqat sumiiffiini ikiorserneqartarnissaannik suliniuteqartoqarpoq, taamaasillutik meeqqat angerlarsimaffiup avataanut inissinngikkaluarlugit ikiorserneqartarsinnaasimallutik.

Qeqqata Kommunia taassuma malitsigisaanik Qeqqata Modelimik pilersitsivoq meeqqat najugarisaminniiginnarlutik ikiorserneqarnissaannik suliaqassalluni. Tassunga atatillugu kommuni arlalinnik suliniuteqarpoq, sulisunillu ulluinnarni meeqqanik sullitaqartunik arlaleriarluni pikkorissaalluni. Sulisut ilaatigut ernumaatsinut uuttuttit, ajornartoornermi upalungaarsimaneq pillugit, meeqqallu akornanni qinngasaarisarneq pillugu pikkorissarneqarsimapput.

- Sulisut pikkorissarnerisa kingunerisaanik meeqqat pissusaat periusaallu eqqumaffigilermatigit nalunaarutiginninnerit amerlisimapput, Paneeraq Olsen oqaluttuarpoq.

Atuarfiit nalunaarutiginninnerulerput

Qeqqata Kommuniani kommunimi pisortaanerup ilisimatitsissutigaa siusinaartumik suliaqarnerup nukittorsarnissaa anguniarlugu kommuni amerlanerusunik isumaginninnermi siunnersortinik atorfinitsitsisimasoq. Isumaginninnermi siunnersorti ataaseq Sisimiuni atuarfinnukartarpoq meeqqanik pisariaqartitsisunik oqaloqatiginnikkiartorluni.

- Isumaginninnermi siunnersorti ataaseq toqqaannartumik atuarfinnut attaveqartuuvoq. Atuartorpassuummatali ataasiinnaanera naammaginanngilaq. Atuarfinni oqaloqatiginnittalernerit kinguneranik atuarfinniit nalunaarutiginninnerit amerlanerulesimapput, Paneeraq Olsen Sermitsiaq.AG-mut oqarpoq.

Sisimiut atuarfiiniit kommunimut 2016-imi nalunaarutiginninnerit 45-pput, 2017-imi 57-iusut, 2018-imilu nalunaarutiginninnerit 79-ullutik. Ukiut pingasut ingerlanerini marloriaatinngungajassimallutik.

Kommuni tamakkerlugu meeqqat inuusuttullu kommunimut nalunaarutigineqartut 2016-imi katillugit 370-iupput, 2018-imilu nalunaarutigineqartut 603-iusimallutik.

Kommune ilisimatitsivoq kommunimut nalunaarutiginninnerit amerlanerpaartaat atuarfinnit, meeqqeriveqarfinnit, peqqinnissaqarfinnit, politiinit, innuttaasunit ilaqutariillu sullissiviannit tunniunneqartartut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER