Qeqqata Kommunia: Meeqqat illersorneqarnissaat pillugu akimut suleqatigiittoqassaaq

Meeqqat illersuisuat angalanermi nalunaarusianik isornartorsiuilluni saqqummiussingaangat tamatigut kommuninit tigulluarneqarneq ajorpoq. Pingaartumik nalunaarusiamik siullermik saqqummiisoqarnerani imminut illersortoqarluni. Ukiorli kingulleq MIO Qeqqata Kommunianut tikeraarnerani nalunaarusiaq oktobarip qaammataani saqqummiunneqarmat allaanerusumik qisuariartoqarpoq. Borgmester Malik Berthelsenip (S) oqaatigaa, tikeraartoqarneq nuannaarutigalugu.

- Meeqqat oqariartuutaat sakkortupput, tusarnaassavavut, kommunillu meerartai inuusuttailu ikiorneqarnissamik pisariaqartitaannik ikiorneqarnissaat anguniagaqartumik sulissutigissallutig, taanna taamani oqarpoq.

Iliuuseqapallanneq

Oqaatsinilli kusassaanginnarniannginnera ilimanaateqarluarpoq. Kommunimi suleqatigiissitanik tamarmik immikkut suliaqartussanik ingerlaannarluni pilersitsivoq. Suleqatigiissani sammineqartussat tassaapput "Timikkut tarnikkullu qaangiiffigitinneq", Siusissukkut iliuuseqarneq pinaveersaartitsinerlu", "Angajoqqaat akisussaanerat meeqqanillu perorsaaneq", "Meeqqat innarluutillit immikkullu pisariaqartitsisut", "Angajoqqaarsiat, meeqqallu angerlarsimaffiup avataanut inissitat" kiisalu "Sunngiffimmi meeqqanut neqeroorutit ornittakkallu".

- Akimortumik suleqatigiinnissatta qanoq pingaaruteqartiginera matumani takuarput.
Suleqatigiissitanilu ilaasortat suliaminnut tunniusimanerat meerartattalu toqqissisimanersumik nuannernerusumillu inuuneqalernissaannut ilungersoqataanerat takullugu assorujussuaq nuannerpoq, tamannalu pillugu nersualaarumavakka, Malik Berthelsen (S) tusagassiuutinut nalunaarummi allappoq.

Isumassarsiaq tassaavoq, suleqatigiissitat kommunip eqqarsartariaasianik kipisissasut.

Atornerluisoqarsimatillugu suleriusissat

Taakkuli katersorneqarput sammisaqarnermilu inunnit 65-nit peqataaffigineqartumi "Qeqqata Kommuniani meeqqat inuunerissut" qulequtsiullugu saqqummiunneqarluni. Politikkerit Qeqqata Kommuniani sulisut, MIO-mit aallartitat, Peqatigiiffik Kalaallit Meerartaanit, Innarluutillit Illersuisuat, Nakuusa meeqqanulli suliniuteqartut allat peqataatitaqarput.

Kinguaassiutitigut atornerluisoqarsimatillugu kommunip pitsaanerusumik iliuuseqartarnissaa siunnersuutit ilagaat. Siunnersuutaavoq, upalungaarsimanissamut pilersaaruteqarnissaq, atornerluisoqartilluguli atugassamik najoqqutassaqarnissaq.

Ullormi immikkut sammisaqarfiusumi angajoqqaat innarluutilinnik meerartallit, angajoqqaarsiat, inuusuttunilluunniit meeraanermi angerlarsimaffiup avataanut angajoqqaarsianut inisinneqarsimasunit oqallissiamik nassarlutik takkuttut sulisuusut naapippaat, soorluttaaq aamma angajoqqaat familieklassitut taaneqartartumiit siornaakkunnili kommunimit suliniutigineqalersumit inernerit kusanartut pillugit tusagassaqartoq.

- Meeqqanut tunngasuni iliuuseqarlutik sorsuuteqaqataasunik naapitsineq peqataasunut tamanut annertuumik misigisaqartitsivoq. Annernarsinnaasunik assigiinngitsunik tikitaqarput, aammali takutillugu, meeqqanut asanninnermik takutitsisinnaaneq sumorsuaq angusaqarfiusinnaasoq, Ilaqutariinnermut isumaginninnermullu ataatsimiititaliami siulittaasoq Hans Frederik Olsen oqarpoq.

Ullormi immikkut sammisaqarfiusumi inernerit akimortumik suleriaqqinnissamut ilaalissapput, piviusumillu suliniutinik pilersitsinerussalluni.