Qeqqata Kommunia: Malik taasisiminik marloriaatinngortitsivoq
Malik Berthelsen Qeqqata Kommuniani borgmesteriuinnarsinnaanngorpoq kommunimullu qinersinermi partiini Siumut peqatigalugu ajugaalluni.
Borgmester Malik Berthelsen 976-init taaneqarluni kommunimut qinersinermut kingullermut sanilliullugu taasisiminik marloriaatingajanngortitsivoq.
Qinersinerup kingorna borgmesteritut issiavimminut eqqissilluni ingissinnaanngorpoq.
- Nuannaartorujussuuvunga oqiliallattorujussuullungalu. Taasisimalu marloriaatinngorsimanerisigut ersarissummik takutinneqarpoq, borgmesteritut ukiuni kingullerni sulinera ajunngitsumik ingerlassimagiga, Malik Berthelsen, S, oqarpoq.
Malik Berthelsen 976-init taaneqarluni kommunimut qinersinermut kingullermut sanilliullugu taasinernik 522-nik amerlanernik siuariaateqarsimavoq.
- Suliama ingerlateqqinnissaanut piareersimavunga. Partiit akimorlugit oqaloqatigiinnerit sapinngisamik piaartumik aallartissavavut. Qinigaaffimmi tullermi sammisat arlallit suleqatigiissutigissavavut, Malik Berthelsen oqarpoq.
Inunnik isumaginninneq inuussutissarsiutillu pingaartinneqartut
Malik Berthelsen Qeqqata Kommuniani taaguunneqarnerpaajusoq Naleqqameersoq Hans Enoksen 419-init taaneqarluni tullersortaavoq parteeqataalu Paneeraq Olsen 320-nit taaneqarluni pingajuattut inissilluni.
Partiit qineqqusaarnerup nalaanili inernileereerput, inunnik isumaginninnerup innarluutilinnullu tunngasut kivinneqarnissaat kommunip suleqatigiissutigisariaqarai. Kisianni inuussutissarsiorneq aamma qaffasissumi inissisimavoq:
- Kommunimi inuussutissarsiorneq ineriartortissavarput. Kangerlussuarmut ATV-nut aqqusinissaq Kangerlussuarmilu mittarfiup ammaannarnissaanik neriorsorneqarneqarneq aqqutigalugit pitsaasunik periarfissaqalersimavugut. Tamatuma saniatigut inuussutissarsiorneq sulissutigerusupparput, Saviminilerinermik Ilinniarfiup nuunneqarnissaanik pilersaarutit aallartinneqareersimammata, Malik Berthelsen oqarpoq.