Qeqqata Kommunia: Ineqarnermut akiliutinik qaffaanerit borgmesterimit illersorneqarpoq
Maniitsumi Sisimiunilu Ini A/S-ip ineqanermut akiliutaasartut qaammammut 2 procentimik qaffanneqassapput aappaagu. Aalajangiineq ineqartunut illersuinerusoq borgmesteri Malik Berthelsen oqarpoq.
Qeqqata Kommuniani kommunalbestyrelsimi ilaasortat amerlanersaasa aalajangerpaat, Maniitsumi Sisimiunilu Inip inissiaateqarfigisaani akigititat to procentimik qaffanneqassasut.
Taamatut aalajangerneq pisariaqartoq Qeqqata Kommuniani borgmesteri Malik Berthelsen Sermitsiaq.AG-mut oqarpoq.
- Ukiuni kingullerni arlalinni ukiumut 2 procentimik allatut ajornartumik qaffaasariaqartarsimavugut najugaqartut illersorniarlutigit aammalu akisussaassusilimmik ineqarnermut ingerlatsinissarput pingaartikkatsigu, oqarpoq.
Siunissami akisunerulersinnaasoq
Najugaqartut artukkinnginnissaat anguniarlugu qaffaanerusoq oqarpoq.
- Tassa 1.000 korunimut qaffaassutaasoq annertussuseqarpoq 20 koruuni. Kommunalbestyrelsemi pingaartipparput attartortut naammagisimaarfigisinnaasaannik toqqissisimaffigisinnaasaannillu najugaqarnissaat, tamannalu anguneqassappat aserfallatsaaliinermut naammattunik aningaasanik toqqortaateqartariaqarpugut, taamaasiunngikkuttami kingusinnerusukkut akiligassaq najugaqartunut akisuninngorluni tuttussaavoq. Takoreerparpummi Namminersorlutik Oqartussaat inaataanni ukiuni arlalinni amigartunik immikkoortitsisarnerup kinguneranik ullumikkut aserfallatsaaliinermut qanoq kinguaattooruteqartiginerat. Najugaqartullu illersorlutigit kommunemi inissiaatitsinni taamaattoqarnissaa uagut kissaatiginngilarput, Malik Berthelsen nassuiaavoq.
Aserfallatsaaliinermut aningaasat
Qaffaaneq kommunalbestyrelsimit Erik Jensenimit aalajangerneqartoq akerlerineqarpoq. Isumaqataannginnerminut tunngaviulersuutigivaa immikkoortortaqarfiit ilaat aningaasaateqarpallaaqimmaat, 20 million koruunit, taamaattumik qaffaanissaq pissusissamisuunngitsoq.
- Taakku 20 million koruunit tusaannarlugit aningaasarpassuartut isikkoqarsinnaapput, kisianni eqqaamassavarput inissiat 636-it tassani pineqarmata, inissiamullu ataatsimut agguataaraanni aningaasarpassuunngillat aammalu siunissami aserfallatsaaliinermut pisariaqartinneqalertussanut ajoraluartumik naammanngillat, Malik Berthelsen oqarpoq.