Qeqqata Kommunia takornariat ornittagaannik utaqqilaartariaqarput
Namminersorlutik Oqartussanit Aasivissuit Nipisanni takornarianut ornittagassaanik ulapputeqanngillat, nuna tamanna UNESCOp eriagisassaatut junimi ilanngunneqarpoq
Takornariat kulturikkut oqaluttuassartalimmut nunamut Aasivissuit Nipisannut alakkaallutik Sisimiunut aqqusaartut Sisimiut Katersugaasivianni Nipisat pillugit saqqummersitamut atajuartumut naammaginniinnartariaqarallassapput, saqqummersitami tassani inuit qanga piniutaat, piniagaat, najugaat, nunamillu assit oqaluttuarisaanerallu ukiuni 4000-ini pisoqaassusillit takuneqarsinnaapput.
Ulapputeqanngitsut
Saqqummersitaq nunamut eriagisassamut tamarmut tunngasunik plakatinik ilagallarneqarpoq, tassami Namminersorlutik Oqartussanit Aasivissuit Nipisannut eriagisassatut toqqangaaqqammertumut tunngatillgu takornariat ornittagassaanni pilersitsinissaminnut ulapputeqanngillat.
Namminersorlutik Oqartussat siunnersortaasa takornarianut ornittagassap imarisassaanik, aningaasalersorneqarnissaanik amerlassusissaanillu Qeqqata Kommunianut oqaloqatiginneqaassasoq, Namminersorlutik Oqartussanit ilisimatitsissutigineqarpoq.
- Oqaatigiuminaappoq siunnersortit sulinerat qaqugu naammassissanersoq, tamannami kommunimik soqutigisaqatigiinnillu allanik oqaloqateqarnerisa qaqugu naammassineqassanersut apeqqutaavoq, Inuussutissarsiornermut Nukissiuutinullu Naalakkersuisoqarfimmi immikkoortortami pisortaq Christian Hjerrild Ovesen oqarpoq.
Tamanna pillugu Sermitsiami saqqummertumi kingullermi paasisaqarnerugit. Uani ataani linki aqqutigalugu aviisimut isissutissarsigit: