Qeqqata Kommunia pinerluttuliortarnermut akiuiniarpoq

Pinerlunneq pinerluutaareersimaguni taamaallat suliarineqarsinnaanngilaq - aammali pinaveersaartinneqarsinnaavoq.

Kalaallit Nunaanni Politiit tusagassiuutinut nalunaarummi taama aallarniuteqarput, taakku Qeqqata Kommuniatalu akornanni isumaqatigiissuteqarnerannut atatillugu nassiunneqarpoq.

Kommune Kujallermisut najukkami siunnersuisoqatigiit aqqutigalugit, oqartussat taakku marluk pinerluttoqartarneranik pinaveersaartitsisunik kommunip nunaqarfiini illoqarfiinilu suliniuteqarnermik suleqatigiissapput.

- Politiit peqatigalugit lokalrådimi suleqatigiinnissatsinnut isumaqatigiissuteqarnerput immikkut nuannaarutigaarput, taamaalilluta ataatsimut unammillernartuutitsinnut ilaatigut pinerlunniarnermik, persuttaasarnermik unnuakkullu toqqissisimangittarnermut tunngatillugu qanimut oqaloqatigiissinnaaniassagatta, borgmesteri Malik Berthelsen oqarpoq.

Qeqqata Kommunianit Kalaallit Nunaannilu Politiinit sinniisuutitat sapaatip akunnerini kingullerni marlunni Kangerlussuarmi, Maniitsumi aamma Sisimiuniinnikuupput paasiniarlugu, najukanni pinerlunniartarnermik unammillernartut qanoq isikkoqarnersut, pinaveersaartitsinissamut periarfissat suunersut aammalu najukkani nukissat suut ikiuukkusunnersut.

Kajumissutsimik suliaqartut

Sisimiuni politeeqarfimmi ittuusoq najukkamilu siunnersuisoqatigiinni siulittaasuusoq politikommisæri Karl Jørgen Lennert oqaluttuarpoq, suliniutit pinaveersaataasut sorliit iluatsissinnaanerannut ingammik kingulleq aalajangiisuusoq.

- Oqartussaqarfittut sorpassuit aallartissinnaavagut kisianni najukkani inuiaqatigiinnit ikiorneqanngikkaanni iluatsinnavianngillat, taanna oqarpoq:

- Inuit namminneq kajumissusillit, peqatigiiffiit, inuussutissarsiuteqarfiit, atuarfiit, paaqqinnittarfiillu sumiiffimmilu nukissat allat nammineq neqeroorutigisinnaasaminnik tunniussinissaat pisariaqartipparput. Imaassinnaavoq ilinniarfiit, pinnguaatinik pinnguarnermut cafèt, unnuamilu angalaartartut sorpassuillu - pinerluttunngornissaraluamiit allamik periarifssaqarnissaa pingaarneruvoq.

Pinaveersaartitsinermi suliniarnermi sumiiffimmi inuiaqatigiit qitiulluinnartuummata, oqaloqatigiinnerni aallarnisaataasuni innuttaasut suliffeqarfiillu aamma oqaloqagatigiinnermut peqataatinneqarnikuupput. Nukiit taakku ilagivaat INI-minngaannersooq Birgithe Christiansen, najukkami Meeqqat oqartussaaqataanerannik suliniut aqqutigalugu meeqqanit inuusuttunillu pissarsiassanik katersisimasoq.

Ataatsimut periusissaq

Meeqqat inuusuttullu isumaat misigisaallu tusarsimatinnagit taakku sinnerlugit inersimasuusugut suliniuteqannginnissaq pingaaruteqartoq, taanna isumaqarpoq – taassumalu oqarnera naapertorlugu Meeqqat oqartussaaqataanerannit tunniussat pitsaasut amerlapput.

- Susassaqartunut pingaarutilinnut Meeqqat oqartussaaqataasut nipaat ingerlatinneqarnissaanut ataatsimiinneq periarfissatsialassuuvoq, ilutigitillugulu migisimavara lokalrådit meeqqat tunniussaat guldtitut isigigaat.

Aallarnisaataasumik sulinerit tunuliaqutaralugit Qeqqata Kommunianut ataatsimoorussamik periusissamik aamma suliniummik pinaveersaataasumik tigussaasumik suliaqartoqassaaq.

Tassunga atatillugu København Vestegns Politi lokalrådimik suliaqarnermik annertuumik misilittagaqartoq ikiuutissaaq.