Qeqqata Kommunia peqqinnerulernissamik suliniuteqarpoq
Qeqqata Kommuniani kommunalbestyrelsep, kommunimi peqqinnissamut pinaveersaatitsinissamullu polikkissaa, Peqqinnarnerusumik inuuneqarneq - et sundere liv akueraat.
Qeqqata Kommuniata innuttaasut tamakkerlugit peqqinnerulersikkusuppai.
Politikki ”Peqqinnarnerusumik inuuneqarneq - et sundere liv” piffissami sivisuumi ineriartortinneqarsimavoq, tassani innuttaasut peqataatinneqarnissaat pingaartinneqarsimalluni. Kommunimi tamarmi, illoqarfinni nunaqarfinnilu, peqqinnarnerusumik toqqagaqartarnissap siuarsarneqarnissaa siunertaralugu, peqqinnerunermik pinarveersaartitsinermillu suliaqarnermi politikki ataatsimoorussamik sinaakkutissiissaaq.
- Qeqqata Kommuniani innuttaasunut tamanut peqqinnerunissap siuarsarneqarnissaanut iluaqutaasussamik, peqqinnissamut pinaveersaatitsinissamullu politikkeqalernerput annertuumik nuannaarutigaarput, borgmester Malik Berthelsen (S) oqarpoq.
Politikkimi pingaarnerutitat tassaapput sunngiffimmi inuuneq, sulineq kiisalu innuttaasut qassinilluunniit ukioqaluarunik peqqissut, politikkillu piviusunngortinnissaanut suliat akimorlugit suliaqarnermut tunngaviusuussaaq. Politikkikkut anguniakkat piviusunngortinnissaannut, suliat ingerlateqqinnissaanut suleriuseq suna pitsaanerpaanersoq suliniutigineqaleruttorpoq.
- Kissaatiginngilarput politikki pappialami oqaasiinnaassasoq kusanartoq, iliuuseqartoqarnissaa kissaatigaarput, taamaattumillu suliamut taamak pingaaruteqartigisumut aningaasaliinissatsinnut piumassuseqarluta, Malik Berthelsen oqaaseqarpoq.
Kommunalbestyrelsi tamarmiusoq Islandimut isumassarsioriartorlutik angalasimapput, angalanerminnilu peqqinnissamut pinaveersaartitsinissamullu suliniuteqarfiusussanut arlalinnik isumassarsisimallutik.