Qeqqata Kommunia misilittagartuumik pisortaaninngortitsisoq
Naalakkersuisuusimasoq Martha Lund Olsen Qeqqata Kommunianut angerlarluni atugarissaarnermut pisortaanertut atorfeqalissaaq.
Kommunalbestyrelsip ulloq 24. februar 2022 nalinginnaasumik ataatsimiinnermini Martha Lund Olsen, atorfinitsitsinermut ataatsimiititaliap inassuteqarneratigut Atugarissaarnermi pisortaaninngortussatut toqqarsimavaa.
Martha Lund Olsenip Nike Berthelsen Peqqissutsimut Naalakkersuisoqarfimmi februaarip aallaqqaataaniit pisortanngortussaq taarsissavaa.
Tusagassiorfinnut nalunaarut naapertorlugu, atorfinitsitsinermut tunngaviuvoq, Martha Lund Olsenip ilinniagarissaarnera aamma susassaqarfimmi misilittagaqarluarlunilu angusaqarluartarnera.
- Martha atugarissaanermut immikkoortortami annertuumik misilittagaqarpoq, upperaara Martha siuttoralugu politikkikkut anguniakkat angujumaarlugit, Kommunimi pisortaaneq Juliane Henningsen Heilmann atorfinitsitsineq pillugu oqarpoq.
Nagguiminnut uteqqittoq
Pisortaanerup erseqqissaassutigaa, Qeqqata Kommuniata ukiuni kingullerni atugarissaarnermut immikkoortortaq, meeqqanut aamma inuusuttunut immikkoortortaq, inunnut innarluutilinnut, utoqqarnut aamma ilaqutariinnermut immikkoortortap ineriartortinneri qitiutittorujussuusimagai.
- Martha Lund Olsenip suleqatiginissaanut taamaalilluta qilanaartorujussuuvugut, pisortaaneq oqarpoq.
Martha Lund Olsen Kommuneqarfik Sermersuumi meeqqanut ilaqutariinnullu ingerlatsivimmi pisortaasimavoq, tassa siorna decembarip aallaqqaataata tungaanut ukiuni sisamani pisortaasimalluni.
- Ukiut 35-t matuma siorna isumaginninnermi siunnersortitut atorfineqqaarfinnut uteqqinnera nuanneqaaq,
Martha Lund Olsen 60-inik ukioqartoq, ukiut 16 kingulliit isumaginninnermi immikkoortortami qaffasissumik suleqataasimavoq, Qeqqatalu Kommuniani Atugarissaarnermut pisortatut ulloq 1. marts 2022 aallartissalluni.