Qeqqata Kommunia: Meeqqanut akilersuutinut peqqussut atorunnaarsinneqarli

Qeqqata Kommuniani meeqqanut akilersuutit – angajoqqaat qimannerminni akilersugassaat – akiitsorineqartut qaffakkiartuinnarnerat ernumassutigineqarpoq.

- Ukiuni kingullerni meeqqanut akilersuutinut akiitsut qaffakkiartuinnarnerat takusinnaavarput, arlaannillu iliuuseqartoqanngippat, amerliartorusaaginnartussaapput. Tamannalu ernumanartoqarpoq, Qeqqata Kommuniani borgmester, Malik Berthelsen, Sermitsiaq.AG-mut oqarpoq.

Aamma atuaruk: Ataatat maanna 344 millioninik akiligassaqalerput

Peqqussutip atorunnaarsinneqarnissaanik kaammattuut

Meeqqanut akilersuutit pillugit peqqussut malillugu akilersuisussaatitaasoq akiliisimanngippat kommuni pisussaatitaavq akiliussigallarnissamut. Qeqqata Kommunianut meeqqanut akilersuutinut akiitsut ullumikkut 59 millionit koruuniupput, siorna piffissap taamaasinerani 3 millionit koruunit missaannik qaffasinneruvoq.

- Taamaattumik ilungersortumik inatsisiliortunut piumasaraarput peqqussutip pineqartup atorunnaarsinneqarnissaa suliareqqullugu, taamaaliortoqanngippammi akiitsut naassaanngitsumik qaffakkiartuinnartussaapput, tamannalu inuiaqatigiittut akissaqartinngilarput, Qeqqata Kommunia borgmester, Malik Berthelsen, kommunalbestyrelsi sinnerlugu allakkani ammasuni Naalakkersuisunut allappoq.

Innuttaasut akisussaaffeqartut

Qeqqata Kommuniani kommunalbestyrelsi innuttaasut inuunerannut toqqannaartumik akulerunniaratik allakkani naqissuserpaat, taamaattoq innuttaasut akisussaaffeqarnerat tikkuarpaat.

- Taamaakkaluartoq kommunimiit isumaqarpugut, innuttaasut nammineq iliuutsiminnut, soorlu meerartaartarnernut angajoqqaallu inooqatigiikkunnaartarnerannut nammineq akisussaasariaqartut.

Anigaasat utertinneqarsinnaanngitsut

- Kommuni akiitsunik akileeqqusissalluni akisussaaffeqannginnami?

- Soorunami akiitsut akilernissaat akisussaaffigaarput. Taamaattoq innuttaasut akissaqanngippata akiliisinnaassuseqarluanngippataluunniit anigaasat amerlanersaat tigoqqissinnaaaneq ajorpagut. Peqqussummik atorunnaarsitsineq tamatsinnut pitsaanerpaassaaq, Malik Berhelsen oqarpoq.

Innuttaasut pisariaqartitaannut atorneqarsinnaangaluartut

Qeqqata Kommuniani kommunalbestyrelsi isumaqarpoq, 60 millionit koruunit missaanni meeqqanut akilersuutinut atorneqartussat allanut atorneqarsinnaangaluartut.

- 59 millionit koruunit aningaasarpapilussuupput innuttaasut pisariartitaannut pisariaqarnerusunut, soorlu meeqqeriviliornermut, inissialiornernut imalluunniit meeqqanut inuussuttunullu suliniutinut atorsinnaasaraluagut, kommunalbestyrelsi allappoq.

Aamma atuaruk: Akiligassat akilinngitsuukkat 36 procentimik qaffassimasut