Qeqqata Kommuniani ilaqutariinnik paarsisartunik pisariaqartitsineq annertuvoq, amerlanerusunillu paarsisartoqalernissaq anguniarlugu kommuni immikkut suliniuteqarpoq, Qeqqata Kommunia nittartakkamini allappoq.

Kommunip ilanngullugu ilisimatitsissutigaa meeqqat arlallit ilaqutariinnut paarsisartunut inissinneqarnissaminnut suli utaqqisut.

- Ilaqutariinnik paarsisartunik pisariaqartitsinerput annertoorujussuuvoq. Meeqqanik inissitassanik utaqqisoqarpoq, isumaginninnermi siunnersorti Mia Siegstad Olsen kommunip nittartagaanut oqarpoq.

Ilaqutariit qulingiluat ujarneqarput

Qeqqata Kommunia ullumikkut 16-inik ilaqutarsiaasartunik peqarpoq.

- Ilaqutariit minnerpaamik 25-it angajoqqaarsiaanissaat Qeqqata Kommuniata angorusuppaa. Meeraqartarmammi angerlarsimaffiup avataanut piaartumik inissinneqartariaqartartunik, kommuni allappoq.

- Meeqqanik inissitassaqariasaartoqartarnera pillugu angajoqqaarsianik piareersimasuuteqarusuppugut. Angajoqqaarsiaasinnaasunik piareersimasuuteqarluta meeqqanik piaarnerpaamik tiguseriaannarnik, Mia Siegstad Olsen.

Misissuinerit arlallit takutippaat meeraq ulloq unnuarlu angerlarsimaffimmut inissinneqarnani ilaqutariinnut inissinneqaraangami peqqinnarnerusartoq.

Qaammatialunni utaqqisarput

Ilaqutarsianngornissamut qinnuteqartoqartillugu qinnuteqaatip akuerineqarnissaanut qaammatini marlunni utaqqisoqartoqarsinnaasarpoq. Assigiinngitsut misissorneqartarput. Soorlu tarnikkut timikkullu peqqissisuseq, aammalu pinerluuteqarsimannginneq.

Meeqqamut pinerlussimannginnermut allatigullu pineqaatissinneqarsimannginnermut uppernarsaat kommunip piumasaqaatigigaa, allassimavoq.

Kommuni ilisimatitsivoq pikkorissaanerit ilinniaqqinnerillu ingerlanneqartartut, ilaqutarsiat meeqqanut pitsaanerpaamik ikiuussinnaanerat anguniarlugu.

Video uani takujuk: