Qeqqani sulisoq: Aqutsisut nukillaartippaatigut

Nikassaaneq, pimmatiginninneq, suleqatiginnikkumannginneq, sulisunillu soqutigisaqannginneq. Pisiniarfiup iluani suanngassineq ingutsinerlu.

Ida Nygaardip, Maniitsumi nipilersornermik atuarfimmi pisortaasup, atuartunillu 25-it missaannik atuartitsisartup, aqutsisuminit qaninnermit misigisarsimavai.

- Misigereerpara aqutsisup sulisut allat ingukkai. Eqqarsarnarsisarpoq uagut peqataanngikkaangatta qanoq inguttarneraatigut. Sulisuusimasut pillugit aamma nuanninngitsumik oqaaseqartarpoq. Tamanna nuannerpallaanngilaq, Ida Nygaard oqaluttuarpoq.

Qeqqata Kommunia ukiuni pingasuni kingullerni sulisut qanoq issusaannik tunngatillugu misissuisitsisimavoq. Sunngiffimmut kulturimullu tunngatillugu immikkoortortaqarfimmi sulisut 38 procentii 2019-imi akisimapput. Akissutit malillugit immikkoortortaqarfinnut allanut sanilliussagaanni, immikkoortortaqarfimmi sulisut aqutsisuminnut tatiginninnerat appasinnerujussuuvoq.

Assimi ataaniittumi takusinnaavat sulisut aqutsinermut tunngatillugu 2019-imi akissutaat.

Qeqqata Kommuniani sulisut qanoq innerat pillugu ukioq manna misissuisitsisoqarmat sulisut tamarmiusut 61 procentii akissutinik tunniussisimapput. Akissutit takutippaat aqutsisunut tatiginninneq suleqatiginninnerlu pitsanngoriaateqangaatsiarsimasoq. Misissuinermili maluginiarneqarpoq sulisut akissutiminni isumaqatigiinngilluinnartut.

Aqutsisumit tapersersorneqannginneq

Ida Nygaard Qeqqani naammagittaalliorsimanermut tunngatillugu soqutigineqanngitsutut misigigami maanna saqqummerpoq. Aqutsisoq pillugu naammagittaalliuuteqarsimanini pillugu ataatsimiinniartarsimagaluarpoq. Maniitsumilu immikkoortortaqarfimmi pissutsit ajorluinnarnerarpai.

- Aqutsisoq soqutiginninngitsutut, tapersersuinngitsutut, tusarnaarusususseqanngitsutut suleqatikkuminaatsutullu misigaara. Malunnarpoq aamma sulisuni tatiginngikkai, Ida Nygaard oqaluttuarpoq.

Naammagittaalliuummit, Sermitsiaq.AG-p tigusimasaanit, oqaloqatigisallu akuersineratigut ilanngussaq:

XX-imut tunngatillugu pissutsit arlallit pimmatiginninnertut taaneqarsinnaapput. Soorlu oqaatsit "Illit piumasat pigukku naammappoq", aamma "Kommunimut nipilersornermut atuarfia, Idap nipilersornermut atuarfiginngilaa" aammalu Brugsenimiinninni nilliaffiginninnera: "Taama ajuallatsigiviit?"

Ida Nygaard isumaqarpoq aqutsisup taama pissuseqarnera sulisut atugarisaannut ajorseriartitsinerusoq. Ida Nygaardip naammagittaalliuutaa Sermitsiaq.AG-p tigummivaa, naammagittaalliuutillu sulisunit allaneersut aamma tigusimallugit. Taakku naammagittaalliuutinut tapersiipput.

- Naammagittaalliuummik tunniussisimasut arlallit maanna sulinngillat. Naammagittaalliuutigineqartunili aqutsisup pissusilunnera pineqarpoq. Suliffimmi atugassarititat pitsaanngillat aqutsisoq tapersersuinngippat, oqaluttuarpoq.

Napparsimasoq

Ida Nygaard Maniitsumi nipilersornermik atuarfimmi 2015-imi atorfinippoq. Suliniutit arlallit, soorlu online atorlugu atuartitsinerit misilittagaqarfigai.

- Online atorlugu atuartitsineq assersuutigigaanni, ullormiit ullormut pissutissaqartinneqarani unitsinneqarpoq. Atuarfiup ineriartortinnissaanut iluaqutissarput unitsinneqarmat isumassaqartinngilara, Ida Nygaard Sermitsiaq.AG-mut oqarpoq.

Aqutsisoq pillugu Qeqqata Kommuniani qullersanut naammagittaalliuutiginnissimavoq.

Naammagittaaliuutilli pillugit ataatsimeeqateqarniarnerit iluatsinnissaat ajornakusoorsimavoq. Ukioq ataaseq sinnerlugu ataatsimeeqatiginninniareerluni kiisami iluatsitsigami, naammaginartumik angusaqarfiunngitsumik ataatsimiissimalluni misigaaq. Maannalu tunniutiinnarpoq.

Nipilersornermik atuarfimmi pisortaq maanna napparsimalluni sulinngiffeqarpoq. Naatsorsuutiginngilaalu suliffimminut uteqqikkumaarnissani.

Sulisunut tunngassuteqartut oqaaseqarfigissanngikkaat

Sermitsiaq.AG-p isornartorsiutit aaqqissuisoqarfiup paasisimasai kommunimi qullersanut saqqummiuppai akissuteqartitsiumalluni. Sermitsiaq.AG-p paaserusuppaa sulisut naammagittaalliuutaannut tunngatillugu suleriuseq qanoq ittarnersoq.

Qeqqata Kommuniani ilinniartitaanermut aningaasaqarnermullu pisortaq, Annga Lynge Sermitsiaq.AG-mut ilisimatitsivoq kommuni inuit ataasiakkaat pillugit oqaaseqarsinnaanngitsoq, sulisuniilli naammagittaalliuutit malittarisassat malillugit suliarineqartartut.

Sermitsiaq.AG-p aqutsisoq pineqartoq aamma saaffigivaa akissuteqartikkumallugu, taannali akissuteqanngilaq.