Qeqqani nanoq sipaarniutissatut atorneqartoq

Nanoq qungujulasoq Qeqqata Kommuniata atuinikinnerulernissamut suliniutaani nutaami ilisarnaatigineqarpoq, kommuni taamatut paasissutissiivoq.

Kommunimi suliffeqarfiit tamarmik ulluinnarni innaallagissamik, imermik kiassarnermillu sipaaruteqarnissaannik ikiorneqassapput.

Sipaarutitik namminneq missingersuutiminnut atorsinnaavaat. Atuarfimmi atuartut ilinniartitsisullu kiassaatit qamittarnerisigut, qulliit qamittarnerisigut erngullu kuuffiata qamittarnerisigut sipaaruteqarluarsinnaagunik immaqa ataatsimoorlutik asiaqatigiissinnaapput, tusarnaartitsinermik ingerlatsisinnaallutik imaluunniit isumassarsiorluni sammisaqarfimmik pilersitsisinnaallutik.

Pissarsiassaqarluarpoq
– Isumaqarpugut ulluinnarni sianiginninnerulaarnikkut pissarsiassaqarluartoq. Suliffeqarfippassuit innaallagissamut, imermut kiassarnermullu aningaasartuutiminnit 10 procentit angullugit sipaaruteqarsinnaapput. Aningaasarpassuanngorsinnaapput avatangiisitsinnullu annertuumik assigiinngisitsilersinnaallutik, Qeqqata Kommuniani aningaasaqarnermut pisortaq Claus Espersen tusagassiorfinnut nalunaarutikkut erseqqissaaoq.

Angalaassapput
Claus Espersen suleqataalu marluk piffissami aggersumi kommunip suliffeqarfiutaanut angalaassapput.

Tamakkunani suliffeqarfiup pisortaa peqatigalugu suliffeqarfik angalaassavaat avatangiisinullu sunniutai misissussallugit. Tamatuma saniatigut sulisup avatangiisinik samminnittup nukissamik sipaarfiusinnaasut tikkuartussavai, taamaasilluni avatangiisit sapinngisamik minnerpaamik sunnerneqaqqullugit.

Pisiortortarneq
– Aamma pisiortortarnerit eqqartussavagut mingutsitsinissaq pinngitsoorniarlugu. Tassaasinnaapput qaqorsaatit eqqiaanermullu atortut, ikummatissat pappialanillu atuineq. Aamma tamakkunatigut ulluinnarni eqqarsalaarluni allannguuteqarneq annertoorujussuusinnaavoq, Claus Espersen nassuiaavoq.

Aamma ulluinnarni atortunik atuilluarneruneq sipaaruteqarnermik kinguneqarsinnaavoq. Aningaasallu sipaarutaasut tamakkua kommunip ingerlatsiviata siunertanut allanut atorsinnaavai.

Atuineq malinnaaffigalugu
Kommunip suliffeqarfiisa innaallagissamik, imermik kiassarnermillu atuinertik namminneq malinnaaffigisinnaavaat Nukissiorfiit nittartagaatigut, aammalu kommunip aningaasanut aqqutsiviatigut toqqaannartumik takusinnaassallugu. Atuineq pinartumik nikissimappat qullersat iliuuseqarlutik aningaasat maangaannarnissaat pinngitsoortissinnaavaat. Avatangiisinik nakkutilliisumik ingerlatsineq Qeqqata Kommuniata 2020-mi Issittumi atuilluartutut maligassiuisuulernissamik takorluugaata ilagaa.

Pingaartilluarlugu
– Kommunalbestyrelsip pingaartittorujussuvaa kommunip avatangiisinik nakkutilliinermik suliaqartutut siuttuunissaa. Taamaattumik nukippassuit atorlugit Qeqqata Kommuniani suliffeqarfinni ataasiakkaani tamatuminnga ilisimanninnissaq annertusarniarparput, Claus Espersen oqaluttuarpoq.