Qeqqa seqernup kissaanik tigooraassutinut maligassiuisoorusuppoq
Qeqqata Kommunia seqernup kissaanik tigooraassutit atorlugit nukissiuuteqarnermi maligassiuisoorusuppoq. Taamaammat borgmesterip tulliata Extreme E-mik ingerlatsisut Kangerluarsuarmi atuarfimmut seqernup kissaanik tigooraassummik tunissuteqarsimanerat naammagisimaarluinnarpaa.
Seqernup kissaanik tigooraassutit Kangerlussuarmi Qinnguata Atuarfianut ullumi sisamanngornermi innaallagissamik pilersuillutik aallartissapput. Taamaalilluni innaallagissorfimmit innaallagissamik pilersuineq seqernup kissaanik tigooraassutinit taarserneqassaaq, atuarfillu minguinnerulissalluni.
Tamanna borgmesterip tulliata aappaata atuarfimmi pineqartumii aamma sulisup Anna-Karen Hoffmannip nuannaarutigaa.
- Soorunami naammagisimaarinnippugut. Kommunitummi maligassiuisoorusuppugut, minguinnerusumik nukissiuuteqarnissamut ukkatarinnilluartut. Taamaammat atuarfimmut tunissut iluaqutaassaqaaq, Qeqqata Kommuniani borgmesterip tulliata aappaa Anna-Karen Hofmanna (A) Sermitsiaq.AG-mut oqarpoq.
Taassuma oqaluttuaraa, ilaatigut Kangaamiuni meeqqerivimmi kiisalu Maniitsumi utoqqaat illuanni atuarfimmilu seqernup kissaanik tigooraavimmik atuinermi kommuni misilittagaqareersoq.
Minguinnerusumik nukissiuuteqarnermi maligassiuisoq
Seqernup kissaanik tigooraaviit atuarfiup eqqaani nunamut ikkunneqartussat Extreme E-mik ingerlatsisunit tunissutaapput. Qeqqata Kommunia sanaartorfigissaanissamut ikkussuinissamullu piujuartitsinissamut immikkoortitanit aningaasanik tapiissutissatut immikkoortitsisimavoq.
Atuarfiup innaallagissamik atuinera seqernup kissaanik tigooraaviit aqqutigalugit ingerlassappat, seqinnartarnissaa aalajangiisuulluinnassaaq.
- Kangerlussuarmi upernaamiit ukiamut seqinnertuaannangajappoq. Tamatuma malitsigisaanik atuarfiup seqernup kissaanik tigooqqaavii seqerngup nukinganik immerneqartassapput, atuarfimmi atorneqarsinnaasunik, Anna-Karen Hoffmanna oqarpoq, nangillunilu:
- Soorunami piffissat ilaanni atuarfik innaallagissamik innaallagissiorfimmiit atuisariaqartassaaq. Piffissami sivisunerusumi atorneqarsinnaasumik seqernup kissaanik tigooraaveqarneq, soqannginnermiit pitsaanerujussuuvoq. Tamatumami aamma innaallagissamut aningaasartuutaasartut arpartingaatsiartussaavai, anna-Karen Hofmanna oqarpoq.
Innaallagiaq akikinnerusoq
Kangaamiuni Maniitsumilu seqernup kissaanik tigooraaviit suliffeqarfinni pineqartuni innaallagiamut aningaasartuutigineqartartut 50 procentimik annikillisissimavaat.
- Seqernup kissaanik tigooraavinnik atuinermi suli misilittakkanik katersivugut. Oqaatigineqareersutullu kommuni maligassiuisoorusuppoq, pingaartumik nukimmik minguinnerusumik atuinermi. Tamanna aallartilluarneruvoq, Qeqqata Kommuniani borgmesterip tulliata aappaa oqarpoq.