Nuummi Ilulissanilu mittarfissuit atulernissaat qanilliartortillugu, Kangerlussuup qanoq pineqarnissaa pillugu ernumanerusoqaleriartorpoq.

Qeqqata Kommunia Naalakkersuisunut aamma danskit naalagaaffiannut allakkanik ammasunik ataasinngornermi nassiussaqarpoq. Kangerlussuup siunissaa pillugu illuatungeriit pilersaarutinik piareersaanissamik suliaqapallaqqullugit kommuni piumasaqarpoq.

- (..) Kangerlussuarmi Mittarfik pillugu isumaqatigiissutit inissinneqarnissaat piffissanngorpoq, taamaalilluni nalornissuteqarneq peerneqarniassammat. Illersornissaqarfiup Kangerlussuarmiinnerani inuinnarnik nukittuumik inuiaqatigeeqarnissaa Danmarkimi Naalakkersuisunut pitsaaginnassaaq. Nunap takornariaqarnikkut orninneqartartup annersaata tullia ineriartortinneqarpat Naalakkersuisut takornariaqarnerup ineriartortinneqarnissaanut takorluugaannut aamma pitsaassaaq, borgmester Malik Berthelsen (S) allappoq.

Paatsoornerit qularnerillu

Siunissap qanoq ittuunissaata qularnanera mittarfiup ingerlannissaanut ajornartorsiutaasoq borgmesteri allappoq. Sulisussarsiorneq sulisoqaannarniarnerlu ilungersunarput, aningaasaleerusuttullu nangaapput, Malik Berthelsen allappoq.

Taassuma ilanngullugu oqaatigaa pissutsit nalunarnerat pissutigalugu tusatsiakkat paatsoornerillu pilersartut.

Borgmesteri naapertorlugu Naalakkersuisut eqqarsaatigisariaqalerpaat mittarfiup kommunimut tunniussinnaanissaa, imaluunniit Kangerlussuaq Kalaallit Airportsip ataanut inississinnaanera eqqarsaatigeqqullugu.

Naleqqami politikeri Pele Broberg Kangerlussuaq pillugu apeqqutiminut qaammat una aallartissimatsiartoq akissutisivoq, apeqqutilli Naalakkersuisunit qaammatini qulingiluani suliarineqaqqaarsimapput.

Naalakkersuisut Kangerlussuup siunissaa pillugu apeqqutinut ersarissumik akissuteqanngillat, mittarfiulli Illersornissaqarfiup atorneqarsinnaanera pillugu danskit naalagaaffiannut isumaqatiginninniarneq innersuussutigalugu.